TUNGOD sa nahitabong trahedya niadtong Dominggo sa hapon, Septiyembre 26, ang hepe sa Cebu Police Provincial Office, Police Colonel Engelbert Soriano, nakig alayon sa local nga kagamhanan sa lungsod sa Catmon aron irekomendar ang pagsuspenso una sa pag bisita sa mga local nga turista sa Tinubdan Falls, sa Barangay Tabili.
Matod ni Soriano nga magpabutang siyag police personnel sa falls aron did-an ang gustong mangaligo aron kalikayan nga masubli ang nahitabo niadtong Dominggo, diin tulo ka mga tawo ang gianod sa baha, duha niini nakaplagan nang patay samtang usa ang padayon pang gipangita.
Magbutang usab silag mga paskin sa lugar nga magpahibawo nga did-an una ang pagkaligo sa falls gumikan kay ting-uwan pa ning panahuna.
Ang nasod naa karon sa panahon sa ting-uwan. Gibana-bana sa weather forecasters nga magsugod ang La Niña sa nasod sa Oktubre.
Ang La Niña magdala og di ordinaryong gidaghanon sa uwan. (AYB)