GARBO sa usa ka lugar kung adunay talagsaong nahimo ang iyang lungsoranon. Sama pananglit sa lungsod sa Zamboanga kung diin gikan ang atong pinakaunang Olympian Gold Medalist nga si Hidilyn Diaz sa bag-o lang nahuman nga Tokyo Olympics ug uban pang medalists nga mga kababayan nato dinhi sa Mindanao.
Nahimo natong mga Dabawenyo nga garbo si Presidente Rody Duterte nga atong Mayor sa dugay nga panahon bisan tuod nga didto siya nahimugso sa Visayas. Karong bag-o, atong ipasigarbo ang pagkatukod sa "Partido Pilipino sa Pagbabago" nga usa ka national political party nga nagdala sa damgo sa yanong lungsoranon sa matuod ug malangkubong kausaban sa ilang kinabuhi.
Natukod kining maong partido niadtong 2020 tungod sa makabungog nga singgit sa katawhan ug kausaban nga nagdala kang Presidente Rody ngadto sa Malacanang niadtong 2016. Dugang niini, ang tinguha nga magpadayon ang kausaban nga iyang gisugdan.
Luyo sa paghasol sa Covid-19, usa ka grupo nga gipangulohan ni Leonardo A. Fernandez, usa ka gamay nga negusyanteng Dabawenyo ug kanhi sakop sa PDP-Laban ang naglingkod aron pandayon ang "Constitution and By-laws" sa wa pa nganli nga partido. Tuod man natapos ang pagsulat ug gisumite kini sa Commission on Elections niadtong Pebrero 17, 2021.
Buot niini nga makaangkon ang nasud og lig-on nga "party system" tungod sa naglipang nga problema sa "turncoatism," "political butterflies" ug balimbing nga mga politiko diin nipatigbabaw ang ilang kaugalingong personal ug politikanhong interes kaysa ang tinuod nga pagpanerbisyo sa katawhan.
Usa sa "12-point agenda" nga dal-on sa ilang mga kandidato mao ang pagsugod sa industriyalisasyon sa nasud pinaagi sa pagtukod sa unang Integrated Steel Mill and Smelting Plant (Ismsp) didto sulod sa dakong minahan sa "iron ore" sa Zamboanga Sibugay, ang gitawag nga bag-ong agianan, "new gateway" sa kalamboan.
Subo nga hangtud karon di pa makahimo og kaugalingong lansang ug distenyador o "screw driver" ang Pilipinas ug kontento lang kita nga mobaligya og hilaw nga materyales sa langyaw'ng nasud nga nagahimo og makina.
Gidala usab sa partido ang panultion o "slogan" nga "Una sa Lahat ang Pilipino" nga gikan sa orihinal nga "First Filipino Policy" ni kanhi Presidente Carlos P. Garcia niadtong 1957. Panahon na nga usbon nato ang tradisyonal nga matang sa politika ug mosentro kita sa pagpauswag sa ekonomiya sa nasud.
Karong adlawa, pagahimuon ang "Party Launching and First National Directorate Convention" didto sa Tagum City. Niining higayona, ilang iduso ang kandidatora pagka-presidente ni Mayor Sara Duterte nga mahimong "standard bearer" sa partido kung ugaling modesisyon kini nga modagan sa bugnong lugaynon karong Mayo 2022.
Apil na niini ang pagduso sa pipila ka mga senador, kongresista, gobernador ug mayor nga mopailawom sa landong sa bag-og partido. Naghandom kini nga makatukod og "Pilipino block" sulod sa Kongreso maoy mopanday unya og mga pro-Pilipino nga balaod nga mopalingkawas sa katawhan sa kapobrehon ug kawalay trabaho.
Di na man gyud malalis nga taliabot na ang piniliay busa manghinaut kita nga limpyo ug malinawon kini. Good luck ug congrats sa tanang delegado ug Kapartido sa PPP.