SIKOP sa Calinan Police Station ang tulo ka mga indibiduwal kinsa nagtagay og ilimnong makahubog ug nagyupyop pa og marijuana gawas sa usa ka tindahan sa Campo 2-A, Barangay Talomo River, Calinan, Davao City, Dominggo sa gabii, Septiyembre 26.
Subay sa report sa Calinan police, nasayran nga nakadawat sila og impormasyon labot sa pagtagay sa mga nahisgutan, hinungdan nga gilayong giadtoan sa mga pulis.
Naabtan ang tulo nga sila alyas Patrick, Angel ug Ken Bryan nga nagtagay og bino nga anaa sa long neck.
Sa pagrekisa sa mga pulis, ang usa kanila nakuhaan og pinaugang dahon sa marijuana sa pitaka niini nga dunay street value nga P900.
Gihikay na sa kapulisan ang kasong ipasaka sa mga dinakpan sa kalapasan sa Republic Act (RA) 9165, kun Comprehensive Dangerous Drug Act of 2002, ug ang kalapasan sa Executive Order 30 sec. 1 series of 2021 in relation to sec. 9 of RA 11332 (Liquor Ban) sa dakbayan sa Davao. (Jeepy P. Compio)