DAKO karon ang pagmahay sa usa ka laborer kay kung wala siya nagmaoy, dili unta siya madunggaban sa silingan.
Mitugpa sa Southern Philippines Medical Center (SPMC) si alyas Arnel, 37-anyos, human dunggaba sa iyang silingan nga si alyas Mario, 44-anyos, construction worker.
Sa impormasyon gikan sa Davao City Police Office, nasayran nga nagmaoy ang biktima diin wala nakaaguwanta ang silingan nga suspek sa kasaba, migawas kini ug nagdala og kotsilyo alas 12 sa tungang gabii niadtong Sabado didto sa Barangay Buhangin Proper, Davao City.
Gikustodiya na sa Buhangin police ang suspek, samtang ang biktima anaa sud sa SPMC. (Jeepy P. Compio)