NAGPOSITIBO sa Covid-19 si First District Representative Paolo Duterte sa siyudad sa Davao.
Kini maoy gibutyag sa igsuon ni Paolo, Mayor Sara Duterte-Carpio, sa paghinabi kaniya sa radyo Lunes, Septyembre 27.
Apan gikanayon sa mayor nga wala pa niya maistorya sa personal ang iyang iguson bahin sa iyang kondisyon.
"Get well soon, Congressman [Paolo Duterte]," matud pa ni Duterte-Carpio sa paghinabi kaniya sa 87.5 FM Davao City Disaster Radio.
Gikanayon sa mayor nga iya lang nahibaw-an ang resulta Lunes na.
Dugang pa niya ang iyang igsuon na-swab test usa ka adlaw una nigawas ang resulta.
Samtang gikompirma ni Representative Duterte nga nataptan siya sa Covid-19 base sa RT-PCR result nga gipagawas Lunes.
Ang kongresista naa karon sa "isolation" sa usa ka ospital, samtang ang iyang pamilya gipailawom sab sa quarantine sa ilang panimalay. Hinuon, ang kongresista walay nakita nga bisan unsang severe symptoms.
Nagpasalamat siya sa tanan kinsa nagpakita og "pakabana" kaniya ug sa iyang pamilya.
Gipasalig niya nga tumanon niya ang quarantine ug padayon nga magserbisyo sa katawhan sa Davao bisan kon naa siya sa isolation.
Kahinumdoman nga si Bise Mayor Sebastian Duterte sab nagpositibo sa sakit niadtong Hulyo 21, nga gikompirma sab sa mayor.
Wala pay impormasyon kon sila si Paolo ug Sebastian na-fully vaccinated na. Apan ang mayor nagbutyag nga fully vaccinated na siya.