WALAY pulta ang mga Pinoy atol unya sa ilang pagtan-aw sa duwa ni Kiefer batok sa iyang igsuon nga si Thirdy Ravena sa B. League didto sa Japan.
Ang Shiga Lakestars nga maoy team ni Kiefer makigbangga sa San-En Neophoenix diin ilang Asian import si Thirday Ravena, manghod ni Kiefer nga maoy ilang labing unang duwa sa pag-abli sa ilang season.
Ang Shiga makigbatok sa San-En karong Oktubre 2 ug 3 diin ang Lakestars maoy mo-host sa unang duwa didto sa Ukaruchan Arena.
Ang maong kalambuan nga pabor sa mga Pinoy fans gianunsyo mismo sa club nga maoy mo-host sa duwa.
“Attention, invite Filipinos to home games for free. All Filipinos who are invited will enter for free on the opening game. #ravenabrothers,” Matod sa tweet sa Lakestars.
Si Thirdy, ang labing unang Pinoy baller nga niduwa sa Japan B. League human siya gikuha sa San-En niadtong 2020 samtang ang iyang igsuon maoy usa sa pito ka mga Pinoy mha nipirma og kontrata sa Japanese teams.
Kini maoy unang season ni Kiefer sa Japan nga direyot wala madayon gumikan sa iyang kaakohan sa Philippine Basketball Association sanglit aduna pa siyay buhing kontrata apan nagkasinabot ra sila kauban ang NLEX management.
Gianunsyo sa Lakestars ang pagpirma og kontrata ni Kiefer niadtong buwan sa Hunyo apan ang PBA niingon nga kinahanglan nga mosunod ang Philippine international sa iyang kontrata sa Road Warriors ug sa uniform players contract sa liga.
Niadto lang Sabado nga nahatagan og official documents si Kiefer pag-release kaniya sa PBA aron makaduwa sa Lakestars sa 2021-2022 B League season.
Napanglantawan nga nindot ang mamahimong duwa sa duha ka team nga gibituonan sa Ravena brothers nga maoy nagsilbing import sa matag team. (PAC)