HUMAN makuha nag serbisyo sa mga batan-on ug talentadong Filipino nga basketbolista, gitutokan na usab karon sa Japan B. League ang posibleng pagkuha sa mga big men gikan sa Philippine Basketball Association (PBA).
Gikareport nga naispatan sa mga scout sa B. League teams ang serbisyo nilang Christian Standhardinger sa Barangay Ginebra ug Ian Sangalang sa Magnolia nga nanghinaot nga makapapirma sa maong mga Pinoy ilawom sa Asian Players quota program sa liga.
Aduna dako nga interest ang B. League Team sa Japan ngadto sa mga Pinoy sama kang Standhardinger gumikan sa iyang gidak-on nga adunay 6-foot-8 nga height nga maoy makapalig-on sa ilang frontline ug dili kini maapil sa kwenta sa foreign imports.
Ang PBA insiders nikumpirma nga si Standhardinger kansang serbisyo nakuha sa Ginebra sa usa ka blockbuster trade kauban si Greg Slaughter niadtong buwan sa Marso, adunay kontrata nga ma-expire karong buwan sa Disyembre ug wala pa makapirma og extension hangtod karon para sa Gin Kings.
Ang kontrata ni Standhardinger na-expire na niadtong buwan sa Agusto but sama sa ubang magduduwa sa PBA, otomatik kining gi-extend sa PBA hangtod sa katapusan sa tuig gumikan sa nahitabong kalisod gumikan sa pandemya.
Ang agent ni Standhardinger nga nakabase sa abroad kinsa mahimong makahimo og deal ngadto sa Japan teams niingon nga ang tanyag sa ngadto sa iyang sakop piloon og katulo ang sweldo sa PBA nga nagdawat og maximum salary nga maoy gitugot sa liga.
Sama ni Standhardinger, si Sangalang wala say gipirmahan nga extension sa iyang kontrata sa Magnolia apan giingong aduna nay sabotsabot ang iyang kampo ug sa Magnolia apan ang player kinahanglan pa kining mopirma sa maong kontra nga hangtod karon wala pa. (PAC)