MOBIYAHE na paingon sa Japan karong semanaha ang duha ka promising young basketball players para sa 2021-2022 Japan B. League season nga sugdan karong Septiyembre 30.
Sila si Dwight Ramos ug Kemark Carino gikatakdang dili makaduwa sulod sa duha ka semana sa ilang tagsatagsa ka mother team gumikan sa quarantine protocol.
Matod pa sa ilang handler nga si PJ Pilares sa Titan Management Group nga adunay 14-day quarantine nga gipatuman ang Japan para sa mga pasahero nga moabot sa ilang nasod sa dili pa sila makaapil sa practice ug official games sa ilang team.
Ang Toyama Grouses naghuwat na sa pag-abot ni Ramos kinsa maayo nga nakaduwa sa Gilas Pilipinas atol sa 2021 Fiba Asia Cup qualifiers.
Si Ramos sigurado nang dili maka-apil sa duha ka duwa sa ilang homecourt batok sa Shinshu Brave Warriors karong weekend ug sa marquee matchup batok sa Alvark Tokyo karong Oktubre 9 ug 10 didto sa Tachikawa Tachihi arena.
Kon walay kakulian sa iyang quarantine, ang 6-foot-4 guard gipanglantawan nga makaduwa sa Grouses nga maoy iyang debut karong Oktubre 16 ug 17 batok sa team ni Bobby Ray Parks, ang laing Pinoy nga gikuha sa Nagoya Diamond Dolphins.
Samtang ang 6-foot-8 nga si Carino gikatakda sab nga moapil sa Aomori Wat’s sa second division human sa maayo niyang performance sa San Beda ug sa Gilas.
Si Kobe Paras moduwa usab sa Niigata Albirex BB sa ilang pag-host sa Kyoto Hannaryz didto sa City Hall Plaza sa Aore Nagaoka.
Si Parks usab sa iyang bahin mobukas sa ilang kampanya batok SunRockers Shibuya at Aoyama Gakuin Memorial Hall nga balwarte sa ilang kontra.
Si Javi Gomez de Liano kinsa gikuha sa Ibaraki Robots mo-debut sab batok sa Akita Northern Happinets didto sa CNA Arena sa Akita.
Ang katapusang Pinoy nga si Juan Gomez de Liano nga gikuha sa Earthfriends Tokyo Z makigbatok sa Kagawa Five Arrows didto aa Takamatsu City Gymnasium sa second division. (PAC)