Hain na diay ang BRT?

Menard dela Paz

Lapu-Lapu City

Pipila na lang ka mga buwan ang nahabilin sa administrasyon ni Presidente Rodrigo Duterte, apan wa pa may kisaw o balita kalabot sa mga public transport nga gipasigarbo sa kagamhanan nga ibutang dinhi sa Metro Cebu.

Ilang gisaad ang mixed nga Bus Rapit Transit (BRT) system ug monorail, apan naa na bay makita nga mga imprastraktura nga timaan nga masugdan na kining mao nga mga proyekto? Wala koy nakit-ang mga timalhan.

Kadto hinuong gikontrata sa Department of Public Works Highways (DPWH) nga kompaniya nga nagtuon alang sa pagtukod og mga flyover sa P. del Rosario padung sa N. Bacalso Avenue makita sa ilang pagtrabaho.

Makaguol kaayo huna-hunaon nga daghan kaayo ang mga meeting nga gjpahigayon sukad sa paglingkod ni Duterte sa katungdanan nga naghisgot alang sa pagtukod og BRT ug sa monorail.

Duna na gani loan gikan sa France ug World Bank. Makahinumdom pa ko sa mga balita sa local newspapers kabahin ani nga mga proyekto.

Nakahinumdom pud ko nga sa 2012 pa ni gisegihan og hisgot ang katukoran kuno unya nag target sa 2018. Apan mag 2022 na lang, hain na man ang BRT? Naa ba toy saad nga tipik ani nga proyekto makita na sa Disyembre 2021. Sakto ba ko?

O basin baya kaning giplanong tukoron nga flyover maoy ipuli sa BRT ug monorail kon mapalpak ang pagpatuman sa duha ka mga proyekto nga gipasigarbong dagko nga mga imprastraktura sa Sugbo nga magsulbad sa trapiko.

Basin moasumer na lang sab ang laing presidente, bisan anino na lang sa BRT ug monorail, way makita. Kutob ra sa drawing ug damgo. Usik kaayo ang pundo nga sa laway ra diay kutob.

Ilang gisaad ang mixed nga Bus Rapit Transit (BRT) system ug monorail, apan naa na bay makita nga mga imprastraktura nga timaan nga masugdan na kining mao nga mga proyekto? Wala koy nakit-ang mga timalhan.