Gibutyag ni Lapu-Lapu City Mayor Junard Chan nga nitubag na ngadto sa kapulisan ang resort diin giingong nagtapok ang mga sakop sa usa ka networking company sa milabayng semana nga giingong wala motuman ang minimum health protocol.
Ang tagdumala sa resort, matod ni Chan, niangkon nga adunay usa ka adlaw nga kalihokan sa usa sa ilang mga function room apan ang pagpangaon sa mga partisipante anaa sa ilang pool side o al fresco setup kun naa na sa gawas.
Apan dili makasiguro ang hotel kon ang mikatap sa social media nga hulagway ug video mao ba usab ang maong kalihokan gumikan kay wala sila magsusi sa maong kalihukan sa ilang function room sa pagsalig nga natuman ra ang minimum health protocol sama sa ubang kalihukan nga ilang gidawat niining panahon sa pandemiya.
Sa pagkakaron, nag-imbestigar pa usab ang resort labot sa insidente, sumala ni Chan.
Ang Lapu-Lapu City Police Office (LCPO) nga gimandoan ni Chan sa pag-imbestigar sa maong kalihukan wala pa usab makakompirma kung nahitabo ba sa miaging semana ang maong kalihukan.
Apan pakyas ang kapulisan sa pag-ila sa nag-post sa mga hulagway ug video nga gipasapasa sa social media ug niani og daghang pagsaway sa netizens.
“Mao na it’s subject for validation gyud kay kabawo na ta karong panahona dunay mga pag discredit sa mga establisimento wa ta kabawo,” matod ni Chan sa Superbalita Cebu. (GCM)