Nipahimangno ang National Bureau of Investigation (NBI) Central Visayas sa publiko nga likayan ang pagpalit og Covid-19 medicines sa black market o illegal nga tinubdan tungod sa dakong posibilidad nga kini fake.
Gipahayag kini ni NBI 7 Director Rennan Oliva 7 human nadakpan nila ang usa ka doktor ug iyang anak babaye human giingong nag-smuggle og mga medisina alang sa Covid-19 diin ang presyo subra kamahal.
Sigon niya nga ang tambal nga Tocilizumab adunay presyo nga presyo nga P25,000 apan gibaligya kini og kapin sa P100,000.
Ang Tocilizumab usa ka anti-inflamatory nga tambal nga gigamit alang sa pagtambal sa severe nga kaso sa Covid-19.
Matod ni Oliva nga grabe ang demand sa maong tambal apan ang manufacturer dili makahatag og igong supply.
Tungod niini, mopili na lang ang uban nga mopalit sa black market tungod sa dinaliang panginahanglan, sigon ni Oliva.
Matod niya nga peligro ang pagkuha niining mga tambal ngadto sa black market tungod kay dili sila sigurado kung asa kini gihimo ug wala kini legal nga dokumento.
Way matumbok nga responsable kon dunay bulilyaso.
Sigon ni Oliva nga kinahanglan mahibal-an sa publiko nga daghan nang butang nga mahimoan og fake labi na karong panahon sa pandemiya.
Dugang niya nga ang kining mga baligya sa black market wala mag-agi sa Food and Drug Administration (FDA) diin wala kini nag-agi og proseso nga lehitimo kini nga produkto.
Kauban ang Office of the Presidential Assistant for the Visaya (Opav), Inter-Agency Task Force (IATF), Department of Health (DOH), ug FDA, sigon ni Oliva nga magpadayon sila sa pagbantay niining mga mag-hoard o magtago sa supply ug mag-smuggle niining tambal alang sa Covid-19 ug oxygen tanks. (KFD)