Bisperas sa kapistahan sa patron sa Lungsod sa Argao nga si San Miguel de Arcangel karon, Septiyembre 28, 2021 ug gipaabot nga modagsa ang mga deboto sa santo labina atol sa kahulogan ugma, Septiyembre 29.
Apan ang mga molupyo subling gipasidan-an ni Mayor Allan Sesaldo nga gidili gihapon ang panagtapok ug pagdawat og mga bisita sa kasaulogan sa piyesta.
Mahimo nga dunay salosalo apan sulod lang sa mga sakop sa pamilya.
Samtang, ang pwersa sa kapulisan ipakatap sugod karon alang sa higpit nga pagpatuman sa health protocol ug paggiya sa dagan sa trapiko tungod sa temporaryong kausaban sa pag-agi sa pipila ka dalan.
Lakip sa gipasiguro sa kapulisan mao ang kaluwasan palibot sa simbahan, merkado ug baybayon sa Barangay Lawis nga naandan nga dagang manuroy.
Sumala sa pahibalo sa lokal nga kagamhanan, ang paghigpit sa protocol tungod sa paningkamot nga dili na mokatap ang coronavirus disease 2019 (Covid-29).
Nihangyo ang kagamhanan sa Argao sa kooperasyon sa publiko ug pagsabot sa labina sa hugot nga pagbantay sa social distancing.
Base sa Septiyembre 20, ang uwahing datos sa lungsod a Covid-19, dunay 78 ka mga kaso aktibong kaso.
Ang Argao usa sa mga karaang lungsod sa habagatan sa lalawigan sa Sugbo ug daghang heritage sites lakip sa iyang puti nga bas sa beach nga kanunay bistahon og daghang lokal ug langyaw nga turista. (ANV)