SUPERBALITA CEBU

Comelec sa Lapu-Lapu gipabantayan og mga pulis

Gimandoan ni Lapu-Lapu City Mayor Junard Chan ang Lapu-Lapu City Police Office (LCPO) sa pagbutang og mga personnel sa buhatan sa Commission on Elections (Comelec) sa ikaduhang andana sa City Hall.

Kini aron nga masigurong matuman ang physical ug social distancing ug uban pang health protocol sa mga buot magparehistro alang sa 2022 nga piniliay.

Niining paagiha, matod sa mayor, malikayan ang posibleng pagtakod sa coronavirus disease (Covid-19).

Gipadayag kini ni Chan human nga nabantayan nga nagsugod na og dasok ang mga Oponganong buot magparehistro alang sa 2022 nga piniliay sa buhatan sa Comelec nunot niining pipila ka adlaw na lang ang nahabilin sa dili pa tak-opan ang rehistrasyon sa Septiyembre 30, Huwebes.

Matod ni Chan nga naandan nang sakit sa Pinoy nga kun ugaling dili duol na sa deadline dili sad maka hunahuna ug parehistro hinungdan sa pagdasok sa mga tawo apan angayan hinumdoman sa katawhan nga ania kita karon sa pandemiya, sumala sa mayor.

Lakip sa awhag ni Chan sa kapulisan nga ipaabot sa ubos ug gawas nga bahin sa City Hall ang linya sa magparehistro aron matuman gayud ang physical ug social distancing.

Aduna nay mga lingkoranan nga gitagana ang kagamhanan kalabot niini.

Kung grabe pa ang pagsugwak sa mga tawo hayan adto pa kini ipahimutang sa Lapu-Lapu City Sports Complex nga nahimutang kilid sa City Hall.

Mitanyag unta ang kagamhanan sa Comelec nga adto na lang sa Sports Complex ang rehistrasyon apan sa kaapiki na sa panahon, maglisod na niini ang taga Comelec hilabi na sa pagbalhin sa ilang mga kahimanan ug posible na hinuong mabalda ang sistema.

“The Comelec already ordered that they will stop the registration if they will not follow the instruction. Makita nato nga nagdasok there is no more social distancing. Lisod kaayo kay kabawo ta nga naa ta sa pandemic karon,” matod ni Chan. (GCM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!