Prosesyon sa Calamba gisusi sa DILG
Giimbestigar sa Department of the Interior and Local Government DILG (ug) kapulisan sa Dakbayan sa Sugbo ang foot procession sa sitio Lower San Roque, Brgy. Calamba, Dakbayan sa Sugbo diin nag-viral samtang dunay nagsayaw-sayaw nga nagsunod sa prosesyon niadtong Dominggo, Septiyembre 26.
Ang kalihukan nakalapas sa mga lagda nga gitakda sa Inter-Agency Task Force (IATF).
Matod ni Cebu City Councilor Joel Garganera, deputy chief implementer sa Emergency Operations Center (EOC), gipaubos sa imbestigasyon ang presidente sa kapilya apil na ang barangay kapitan nga si Victor Quijano.
Ila pang gihuwat ang resulta sa imbestigasyon sa pagkakaron.
“Giapil nila og imbestigar ang barangay captain. Giapil nila sad og imbestigar ang presidente sa maong kapilya,. Ang head pud sa drum and bugle kay mao man toy nakadag hugyaw. Ang nahitabo man gud kay gilibot nila ang santos sa ila ra nuong sitio but that is still a violation so angay sila manubag niana,” matod ni Garganera.
Matod ni Garganera nga lahi ra ang mahitabo sa pagpananghid ug sa aktwal nga panghitabo, human giingon nga nananghid ang presidente sa kapilya ug gisunod ang health protocols.
WA TUGOTI
Unang nahinabi sa mga reporter si Quijano niadtong Dominggo atol sa Promdi kickoff.
Matod niya nga wa tuguti ang maong prosisyon ug ang iyang gitugot mao lang ang motorcade ug ilibot ang santos dayon ibalik sa kapilya.
“Nananghid na sila nga mag-fiesta. Wa ko ni-allow nga mag-prosisyon. Akong gihangyo nga motorkada ra. So unsa ilang gibuhat, ang santos ilang gialsa, gituyok palibot sa ilang sitio unya kanang luyo sa ilang sitio, bag-o nang naigo sa sunog, two months ago. Ang problema wa sila nananghid nga mogamit sila og drum and bugle, pero wa na nisunod ang drum and buggle sa ilang foot procession. Didto rana sa bay nag-atang. Karon pag-abot sa santos nga gikugos, ang mga tawo nanayaw, gatukar man sad ang drum and bugle,” matod ni Quijano.
Giklaro ni Garganera nga wa gihapon gitugot ang pagmisa sa mga kapilya ug gipangadyean lang ang kapistahan.
Sigon ni Garganera nga gidili pa gihapon ang foot procession base sa lagda sa Archdiocese of Cebu. (MVE)