Gikalipay sa Kagamhanan sa Dakbayan sa Sugbo ang padayong pagminos sa kaso sa Covid-19, diin adunay 39 ang bag-ong natala sa Lunes, Septiyembre 27.
Mokabat lang sa 876 ang aktibong mga kaso sa Covid-19.
Atol sa press conference sa Septiyembre 27, matod ni Konsehal Joel Garganera, deputy chief implementer sa Emergency Operations Center (EOC), nga nag-average og 6 porsyento nga daily positivity rate ang dakbayan.
Subay niini, sukad sa Septiyembre 25, gikan sa 11 ka private hospitals ug upat ka public hospitals sa dakbayan, 12 niini ang naa sa safe o 60 percent occupancy rate, usa ang moderate o 60 to 70 percent, usa ang high risk level o 70 to 85 percent ug usa ang critical level o 85 percent occupancy rate.
Sigon ni Garganera nga usa ka hiniusang pagtinabangay sa EOC, Cebu City Police Office, Prevention Restoration Order Beautification and Enhancement (PROBE), barangay officials ug uban pa ang nakapaminos sa mga kaso.
Gidayeg usab ni Garganera ang mga tagdumala sa mga establisemento tungod sa kooperasyon sa pagpatuman sa health protocol sa ilang mga kliyente, apil na ang publiko. (MVE)