KIDAPAWAN CITY -- Luwas na ang upat ka mga tawo nga giingong na-gas poison sulod sa kotse nga ilang gisakyan alas 12:30 sa udto, Lunes, Septiyembre 27, 2021.
Mga biktima giila nga sila si Vanessa Escander, 39, Jayson Escaner, 31, Mary Jane Barcenilla, ug Juanito Tolemia nga pulos molupyo sa Purok 5, Barangay Anonang, Midsayap, North Cotabato.
Giingong mga biktima sakay sa Toyota Vios, kolor pula nga dunay plaka PHO 407.
Sigun ni First Lieutenant Nurjhasier Sali sa Datu Montawal Municipal Police Station nga nahibulong ang pipila ka molupyo sa Barangay Tunggol, Datu Montawal sa probinsiya sa Maguindanao sa usa ka Toyota Vios nga dunay plaka POH-407 nga miparada kilid sa national highway duol sa Tunggol National High School.
Apan mas nahibulong sila kay wala man manggawas ang mga sakay sa kotse.
Sa diha nga ilang gisusi, ilang nakita ang upat ka tawo nga mora og nangatulog sulod sa kotse nga nag-andar pa ang makina.
Busa gisulayan nila og pukaw ang mga biktima apan dili momata bisan og nagginhawa pa.
Abtik nga nagresponde ang kapulisan, uban ang rescue unit sa Datu Montawal ug gidala ang mga biktima ngadto sa Albutra Medical Hospital sa Kabacan, North Cotabato.
Nasayran nga ang kotse gipanag-iyahan sa usa ka Mae Alcasid nga taga Davao City base sa nakuha nga rehistro sa sakyanan. Ug nasayran nga carbon monoxide poisoning ang nahitabo sa mga biktima gumikan kay dunay singaw o leakage sa aircon sa ilang gisakyan. (Edgar E. Fuerzas)