TAGUM CITY, Davao del Norte -- Giindorso si Davao City Mayor Sara Duterte-Carpio sa Partido Pilipino sa Pagbabago (PPP), usa ka national party nga girekognisa sa Commission on Elections (Comelec), niadtong Septyembre 27, 2021.
Atol sa Party Launching and National Directorate Convention sa Big 8 Hotel sa Tagum City Martes sa buntag, Septiyembre 28, opisyal nga ginominar si Duterte-Carpio isip standard bearer sa partido sa pagka-presidente sa 2022 elections.
Sumala ni PPP director general Leonardo Fernandez nga opisyal nila nga gitudlo si Duterte-Carpio nga standard bearer, ug ang mayor na ang ilang pasagdan kinsa ang mamahimong ka-tandem niini sa piniliay pagka-bise presidente.
Atol sa programa gihan-ay sab sa grupo ang mga plano sa ilang pagpagula og Certificate of Nomination and Acceptance (Cona) sa mosunod nga mga adlaw sanglit taman sa Oktubre 8 ang filing sa Certificate of Candidacy (COC).
Kini na ang ika-siyam nga partido nga nag-nominar kang Duterte-Carpio nga mamahimong standard bearer sa 2022 elections. (Jeepy P. Compio)