KAMBAL ug laing usa ang namatay sa natigayong pagpangdunggab alas 10:50 sa gabii niadtong Septyembre 27, 2021 sa Purok 6, Sitio Milagrosa, Barangay Catigan, Toril District, Davao City.
Gipang-ila ni Police Major Michael Uyanguren, hepe sa Toril Police Station, ang mga biktima nga mao ang magsuong kambal nga sila Crispin Baslote, alyas Dondon ug Junrey Baslote, alyas Koykoy, pulos mga construction worker.
Subay sa spot report sa Toril police, gisaysay sa usa ka Carla Rasay ngadto sa mga pulis nga alas 9 sa gabii, iyang nakita ang mag-igsuon nga naglalis.
Taud-taod giduol kini ug gibadlong kinsa usa sa mga live-in partner sa kambal, apan imbis nga motuo ug moundang, gitabangan hinuon sa kambal og kulata.
Dihang nakita kini sa ig-agaw nga si Roel Ali iyang gitabangan ug giulang apan si Roel na hinuon ang gidunggab sa usa sa mga kambal.
Wa na niini nakita pa ang nahitabo human siyang midagan ug nangayo'g pakitabang sa ilang barangay kapitan.
Sa ilang pag-abot, nakita na lamang nila ang mag-igsuon nga duna nay mga samad dinuggaban sa nagkadaiyang parte sa lawas ug anaa na sa kanal.
Aduna say mga samad-dinuggaban ang mag-ig-agaw nga usa ka Ferlan ug Roel nga daling gipangdala sa Southern Philippines Medical Center apan pipila ka oras namatay ra sab si Roel sa ospital.
Wala sab nasayran unsay hinungdan sa panaglalis sa kambal nga misangko sa pagrambol ug dinunggabay sa upat.