DILI mominus 22 ka mga senador ang ningbotar sa pag-usab sa kasamtangang Anti-Rape Law nga namugna niadto pang tuig 1997.
Ang Senate Bill (SB) No. 2332 giaprubahan sa mayoriya sa Senado sa ikatulo ug katapusang pagbasa niadtong Lunes, Septiyembre 27.
Sa maong pag-aprubar sa balaud, ang Senado niuyon sa sugyot nga patas-an ang age of sexual consent o ang pangedaron sa pagtugot sa pakighilawas gikan sa above 12 ngadto sa above 16 years old.
Sa laktud, usa kini ka lang batok sa pagpanglugos sa mga bata o child rape.
Kini nagpasabot nga ang edaran nga makighilawas og batang nagpangedaron og 16 ug paubos, makonsiderar kini nga pagpanlugos.
Dili na kinahanglan nga pamatud-an kon nitugot ang bata sa pakighilawas kay automatic kini nga ilhon nga “statutory rape” sa maong higayon.
Sa wa pa maaprubahi ang maong sugyot sa pag-usab sa pangedaron sa sexual consent, ang Pilipinas maoy dunay labing ubos sa Southeast Asia ug usa sa mga nasod lukop kalibutan nga nagtugot nga makighilawas ang edaran ngadto sa nag-edad og 12 nga bata.
Sa balita gikan sa Rappler, gikalipay sa mga senador ang maong kalampusan.
Matod ni Senador Risa Hontiveros, usa ka kadaugan sa mga bata ug mga nag-adbokasiya sa ilang katungod ang pagpasar sa Senate Bill. Si Senador Richard Gordon nagkanayon nga mas vulnerable ang mga bata kon maggpabilin nga dose anyos ang age of consent sa Pilipinas.
Nunot sa maong pagpasar sa balauad, posibleng ma-amyendahan ang ubang child protection laws nga makita sa Revised Penal Code ug sa Anti-Child Abuse Law.
Sa House of Representatives, naaprubahan na sab ang susama nga balaudnon niadtong Disyembre 2020.
Usa na lang ka lakang ang gipaabot aron hingpit nga mahimong opisyal ang kausaban sa Anti-Rape Law. Mao kini ang pag-abot sa mga senador ug kongresista sa Bicameral Conference Committee aron paghusay sa mga unod sa managlahing bersyon sa ilang mga balaudnon pag-usab sa Anti-Rape Law. Ila dayon kining isumiter ngadto sa Presidente aron mapirmahan ug aprubahan kini.
Usa ang Children’s Legal Bureau (CLB) isip miyembro sa Girls Advocacy Alliance (GAA) sa mga miduso sa kausaban sa Anti-Rape Law nga namugna niadtong 1997 o (23 ka tuig na ang milabay lakip na ang pagpataas sa edad sa age of statutory rape ug sexual consent.
Lakip sa mga unod sa managlahing balaodnon sa House of Representatives ug Senado ang gitawag nga close-in-age exemption kon diin walay krimen sa pakighilawas tali sa mga menor de edad nga mitugot sa maong akto; pagpabug-at sa mga silot batok sa mga rapist, ug uban pang mga kausaban nga nagtinguha nga mas mapanalipdan ang mga biktima sa pagpanglugos labina ang mga bata.
Gipanglantawan sa among organisasyon nga momenos na ang pagsi-aw sa mga abusado ug mapahimuslanon kon mapalig-on ang Anti-Rape Law pinaagi sa pag-amyenda sa maong balaod. Nagpabilin hinuon ang hagit sa komunidad nga musalmot sa adbokasiya batok sa pagpanglugos ug pagpanubag sa mga sad-an sa balaod.
[Lindog sinuwat ni Atty. King Anthony Perez, usa sa mga abogado sa Children’s Legal Bureau. Mahimo kamo nga mopadangat sa inyong mga suliran o pagsumbong sa kaso sa pagpangabuso pinaagi sa pag-email (clbphilscebu@gmail.com) o pag-send og mensahe sa Facebook Messenger: m.me/ChildrensLegalBureauInc]