SUNOD adlaw, Oktubre 1, magsugod na ang pag-file sa certificate of candidacy (COC) alang sa gusto nga magpapili sa sunod tuig nga eleksiyon. Apan hangtod niining mga panahona, wala pa gyuy klaro ang uban kon mokandidato ba o dili og unsang posisyon nga ilang daganan. Naghunahuna o naghinuktok pa gyud siguro og maayo sa dili pa sila modesisyon.
Samtang seguro ang uban, naghilumhilom pa lang ug gusto kaha surprisahon ang ilang mga kontra.
Apan dili naman seguro gikinahanglan pang surprisahon ang imong kontra kay naa pa may kampaniya sa dili pa ang eleksiyon sa Mayo 2022.
Sa Lalawigan sa Sugbo, unang gihugonhugon nga si kanhi fifth district congressman ug kanhi tourism secretary Joseph “Ace” Durano mao mokontra ni Gov. Gwen Garcia kay si Vice Gov. Junjun Davide dili man gyud na makig-atbang ni Gwen. Mikakak man gani niadtong 2019 elections nga incumbent governor siya niadtong panahona. Karon pa kaha nga bise gobernador na lang siya ug wala pa gyuy nahimo.
Walay problema si Ace kay usa ka maayong tawo. Walay dautan nga record sa pulitika og mga isyu kabahin sa graft and corruption niadtong kongresista pa siya sa ikalimang distrito ug pagka-tourism secretary sa panahon ni Gloria Macapagal Arroyo. Dili ako expert nga political analyst, taghaptaghap lang ning ako. Apan makaingon ko nga medyo tungason ang kandidatura ni Ace. Ato kunong suwayan paghagpat ang kahuyang sa iyang kandidatura.
Una, wala kaayoy exposure si Ace sa tibuok lalawigan ug wala siyay political machinery. Sa fifth district siguro nga maoy ilang stronghold apan dili sa tibuok lalawigan. Samtang si Gwen exposed kaayo ug gani nagsige naman og suroy-suroy karon. Ikaduha, sa tanang pito ka mga kongresista sa lalawigan, walay usa nga mosuporta ni Ace, atoa tanan ni Gwen.
Kining congressmen mao kini ang agdon sa mga mayor sa ilang distrito ug mga botante mismo. Inpluwensiyado man ning mga kongresista labi pa kon re-electionist. Pag-ingon sa mga kongresista nga kini maoy suportahan niya, mosunod ang mga mayor ug mga kapitan sa iyang distrito. (bobbygnalzaro@gmail.com)