SA dihang mibisita si Senador Ping Lacson ug si Senate President Sen. Tito Sotto, ang una nilang gibuhat mao ang pagbisita ni Governor Gwen Garcia. Nahitakdo kini sa karaang pamatasan nga kon mosulod ka sa lagwerta sa imong silingan, ang angay nimo buhaton kay mananghid gyod ka.
Manabitabi gyod ka sa hingtungdan aron di ka ingnon nga way batasan.
Niining bag-o pa lang, mibisita si Senador Manny Pacquiao sa Sugbo aron paghimamat sa iyang leaders ug supporters diri.
Ang pangutana, mibisita ba si Pacquiao ni Gov. Gwen Gacria?
Kon wala, ngano man kaha?
Kinsay nagbuot niini?
Dunay huhungihong nga segurado nga molansad si Davao City Mayor Sara Duterte-Carpio pagka-presidente. Modagan kini ubos sa partido nga People’s Reform Party (PRP).
Ang atong source nagsulti usab nga molansad sab si Bongbong Marcos pagka-presidente ubos sa Kilusang Bagong Lipunan (KBL).
Kon tinuod kini, lima na sila nga mokandidato pagka-presidente, sila si Ping Lacson, Isko Moreno, Manny Pacquiao, Sara Duterte-Carpio ug Bongbong Marcos. Dili na lang nato iapil og kwenta kadtong gitawag og nuisance candidates.
Nindot kini kay daghan kita og kapilian. Dili na lang nato hisgotan og kinsa kanilang lima ang adunay advantage o bintaha.
Ang segurado lang diha sa pagka-karon kay nasayod silang lima nga dako ang gastohon kon piniliay na sa pagka-presidente ang hisgotan.
Padaghanay sa kwarta. Kini ang bugtong ilhanan sa kalig-on sa kandidato. Mahimong mosandig sa partido, apan sa akong nahibaw-an, huyang ang dugukan kon mao kini ang saligan.
Sama niadtong nahitabo sa usa ka kandidato pagka-gobernador. Gipasaligan siya sa kandidato pagka-presidente nga tagaan siya og ayuda nga dili mominos sa P150 milyunes. Pero gisultian siya nga mogasto usa siya sa iyang kaugalingon nga kwarta, ihatag lang ang P150 milyunes duha ka semana sa dili pa ang piniliay.
Tuod man, milansad ang kandidato pagka-gobernador. Gigamit niya ang iyang kaugalingong kwarta, nangutang sa pagtuo nga aduna pa siyay madawat nga P150 milyunes.
Apan naunsang pagka-unsaa nga sa dihang nanawag na ang kandidato pagka-gobernador, di na man motubag ang nagpasalig kaniya. Nahibaw-an na lang niya nga wala nay kisaw ang kampo sa kandidato pagka-presidente kay gidawat na niya ang kamatuoran nga mapildi siya.
Ang resulta napuno sa untang. Leksiyon, kon way dagnang kuwarta, di magpatugatuga.