SUPERBALITA CEBU

Editoryal: Garbo, pagdumot

Editorial art by Ariel Itumay

SA dugay o madali, ang dautang binuhatan mabutyag labina kon kini naglambigit sa pagkutlo sa sagradong kinabuhi sa tawo. Matod sa karaang panultion, “Way asong makumkom.” Mogawas ang kamatuoran sa dagan sa panahon. Masinati ang tino nga dimalas sa naghimo sa yawan-ong buhat.

Ang nahitabong pagbanhig-patay sa Barangay Tag-ubi, Lungsod sa Compostela niadtong Septiyembre 16 sa hapon kang Kalawangan Barangay Kapitan Junry Noya Aligato, 40, sa Lungsod sa Asturias, ang duha ka mga suspek nasikop na niadtong Septiyembre 24, 2021 sa ilang dapit sa Kalawangan, Asturias.

Ang mga nadakpan mao sila si Ricardo Bohol, konsehal sa Kalawangan, ug Richard Gonzaga human gitumbok sa kauban sa kapitan nga barangay tanod nga si Emedio Aligato nga samdan usab apan naluwas. Ug mas mibug-at ang ebidensiya tungod sa motorsiklo sa suspek nga nabilin sa crime scene.

Nasubay sa Criminal Investigation and Detection Group Mandaue Field Unit inabagan sa Compostela ug Asturias Police Stations ang tag-iya sa motorsiklo nga si Samuel Batucan Yungco, taga Brgy. Babag 1, Siyudad sa Sugbo kinsa nikompirmar nga gihuwaman kini ni Bohol nga gamiton sa pagbanhig sa kapitan.

Apan unsay nag-aghat sa krimen? Klaro nga ang pagdumot, garbo ug kahakog sa gahom. Mawad-an na maayong pagbalanse sa hunahuna kon kini ang maghari. Matod pa, ang duha dunay daang panagbangi. Wa kita masayod sa insakto ug kon unsa kalawom ang ilang away apan, ang labing segurado nga dakong sayop ang pagpatay.

Makuhaan nato kini og leksiyon. Mapanaminan sa bisan ngadto ubang aspeto sa atong kinabuhi. Dili magbaton sa subra nga negatibong pagbati. Palabihon ang panag-uli sa maayong relasyon pinaagi sa dayalogo ug pagpasaylo. Ug magpuyo nga malinawon. Walay samok ang konsensiya.

Hinumdomi, way asong makumkom ug ulahi na ang pagbasol. Ang salaud bayran subay sa nalatid sa balaud.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph