SUPERBALITA CEBU

Giila tungod sa wedding ring

NAPALGAN NA. Lawas ni Jacel Alastra, 32, napalgan sa mananagat didto sa lawod sa isla sa Camotes kaadlawon sa Septiyembre 29, 2021. Bugtong bra nga puwa nalay nahibilin nga nitapot sa lawas samtang positively identified ang minatay sa iyang bana pinaagi sa wedding ring ilabi na nga nadugta na ang lawas ug dili na mahitsura ang nawong. (Konsehal Dan Jusay)

NAKIT-AN na ang patayng lawas ni Jacel Alastra, 32, human mabanlas niadtong Dominggo, Septiyembre 26, 2021 sa Tinubdan Falls sa Barangay Tabili, Lungsod sa Catmon, Lalawigan sa Sugbo.

Samtang si Catmon Mayor Irish Gestopa nimando sa pagpasira sa Tinubdan Falls.

Ang lawas ni Alastra, napalgan niadtong kaadlawon sa Septiyembre 28 didto na sa tunga-tunga sa lawod sa isla sa Camotes.

Ang mananagat nga si Antonio Bueno, taga-Lungsod sa Carmen, maoy nakakaplag sa lawas nga nagpa utaw-utaw.

Si Catmon Councilor Dan Jusay misaysay sa dihang nahinabi sa Superbalita Cebu nga samtang si Bueno nanagat nakugang siya sa dihang iyang nasigpatan ang burot na nga lawas sa tawo nga naglutaw.

Nag-ubo ang patay nga wala nay sinina gawas sa iyang bra nga kolor nga puwa.

GIGUYOD NALANG

“Gi-abay-abayan lang ni ang patay nakuyawan sab siya pero ma-anod naman gyud padulong sa Camotes, iyang gihiktan ang tiil,” dason ni Konsehal Jusay.

Naghinay siyag guroy niini hangtod nga naabot sa Coast Guard Station sa Carmen sa mga 6:00 sa buntag.

Samtang ang buhatan sa Municipal Disaster sa Carmen mao nay mipahibawo sa Catmon.

Sa mga 10:00 sa buntag miabot ang bana ni Alastra nga positibong miila sa lawas nga iya sa iyang asawa.

Bisan tuod nga dili na mahitsura ang panagway sa minatay tungod sa pagkadugta ug miburot na ang lawas apan pinaagi sa gisul-ob nga wedding ring nailhan kini sa bana.

Samtang ipatawag ang caretaker sa luna sa Tinubdan Falls, Baranga Tabili, sa dihang nasayran nga naningil og entrance fee nga P50.

Matod pa ni Jusay nga way permit ang maong dapit gikan sa buhatan sa mayor.

GIPASIRHAN

Gipahibawo ni Catmon Mayor Irish Gestopa nga dili na pakaligo-an ang Tinubdan Falls tungod sa di maayong kahimtang niini nga risgo sa mga mangaligo.

Matod ni Gestopa nga ang maong tourist attraction wala girekomendar sa local government unit (LGU) sa Provincial Tourism Office nga buksan tungod kay ilang napanglantawan nga dili luwas.

Dugang sa mayor nga bisan pa man og wala kini gi-promote sa LGU, daghan gihapon ang mobisita tungod sa makadani niining tubig.

Tungod sa trahedya, migahin na og pundo ang lungsod nga moabot sa P50,000 alang sa pamilya nga namatyan. Diin P30,000 niini maoy ihatag sa pamilya nila ni Jacel Alastra ug Princess Alastra.

Samtang P20,000 usab ang gigahin alang sa pamilya ni Kent Monterola.

Ang Catmon, gawas sa nindot nga katubigan, ilado kini sa mga dagkong bungtod ug lamian nga delicacies sama sa bibingka, budbod kabog, mga prutas utanon ug uban pang lagutmon.

Unang nakit-an niadtong Septiyembre 26 sa gabii si Kent Jude Monterola, pagka-Lunes, Septiyembre 27 sa buntag ang 7 anyos nga Si Princess Alastra anak ni Jacel. (GPL, ANV )


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!