MAAYONG adlaw na sab mga Super Suki. Tulin kaayo ang tuyok sa adlaw. Ang bulan mora lang og kalinyasan, hapit na pud mapupos ang bulan sa Septyembre. Magsugod na gyud ang filing sa Certificate of Candidacy (COC) sa mga kandidato.
Gikan sa ilang pag-file, duna tay unom ka bulan aron pagahinuktukan, kinsa ang atong pilion nga mosunod nga presidente sa nasud ug kinsa sab ang atong pilion nga mga senador hangtud sa mga mangulo sa kalungsoran uban sa mga sakop sa konseho.
Taas ang atong panahon sa pagtimbang-timbang, ang atong boto ba mamahimong alang sa kalamboan sa tanan o moboto ba lang ta kay duna tay personal nga natagamtam?
Nasulat na nga kabahin sa kinabuhi sa mga Pinoy ang paglantaw sa utang kabubut-on. Butang kini nga dili kabayran ngadto ni bisan kinsa nga atong nautangan.
Subo lang palandungon nga dunay daghan nga personal nga kaayohan ang ginatan-aw, dili moboto sa usa ka kandidato tungod naigo sa mga programa sa gobyerno nga gipatuman, hinungdan pinaagi sa balota panahon sa eleksiyon, ang panimalos iyang ipatagamtam.
Sa mga nanglabay nga administrasyon sa nasyonal nga kagamhanan, managlahi ang nasinatian sa katawhan.
Niagi ta sa panahon sa kasakit, nagkadaiya nga trahedya ang naagian. Daghan ang niresponde ug daghan ang niabot nga mga hinabang apan gilumluman lang sa mga naa sa gobyerno hinungdan nga wala gyud nakaabot sa kamot sa mga naalaut nga katawhan.
Daghang bugas sa mga warehouse ang giagup-op, giulod samtang daghan ang nagtiyabaw, igo na lang mopatulo sa ilang mga luha sa kagutom, nagkutoy ang tiyan.
Sa administrasyon ni Pangulong Rodrigo Duterte, gihimo niyang gawasnon ang katawhan sa kahadlok sa pagsumpo sa mga krimen tungod sa paghitak sa druga.
Daghan ang nalipay apan ang mga naparot sa milabay nga eleksiyon ninghulhog sa mga kabanay sa mga biktima sa kampanya kontra sa druga nga ipa-imbestigahan sa International Criminal Court (ICC) tungod sa kamatayon sa daghan ubos sa kampanya ni Digong kontra sa druga.
Gibanhaw na sab ang isyu sa pagpangabuso kuno sa tawhanong katungod nga nagsugod sa mayor pa si Digong sa dakbayan sa Davao.
Tungod sa politika, ang kanhing mga kaalyado ni Digong, karon mao na sab ang tigpaghot kaniya.
Nagkainit ug nisamot ka lugaw ang dagan sa politika sa nasud.
Misunod sa pagdeklara sa LacSot tandem ni Senador Panfilo Lacson ug Tito Sotto nga di gyud papugong si Senador Manny Pacquiao jat magpapili sab pagka-presidente ubos sa Partido Demokratiko Pilipino–Lakas ng Bayan (PDP-Laban) Pimentel faction.
Mideklara sab sa iyang pagdagan si Manila Mayor Francisco Isko Moreno Dumaguso. Mahimo kini nga DumOng tandem kay si Dr. Willie Ong mao kuno ang iyang vice president.
Ginahulhugan pa sa Partido Federal ng Pilipinas nga padaganon si kanhi Senador Ferdinand Bongbong Marcos Jr. isip standard bearer sa ilang partido.
Ang katawhan nagsige na pagsinggit nga RUN, SARA, RUN, apan nagpakahilom ang mayora. Wala pay piho nga tubag si Mayor Sara sa nagaawhag kaniya.
Sa laing bahin, daghan na nga tarpaulin ug mga poster ang nagapaila kaniya. Kung naa pay pag-awhag nga "VOTE", mao na na siya.
Kinsa man ang angay pilion sa umaabot nga eleksiyon? Atong hinuktukan samtang layo pa ang panahon.