USA ka adlaw una opisyal nga nagpahibawo ang Commission on Elections (Comelec) sa paglugway sa voter registration alang sa Mayo 2022 nga eleksiyon, mga Dabawenyos midagsa sa registration site sayo sa kaadlawon, Miyerkules, Septiyembre 29, 2021, hinungdan nga health protocol wala na maobserbahi.
Base sa pagpanubay sa SunStar Davao, makita nga naglinya ang katawhan sa gawas sa Magsaysay Park, kon diin ang buhatan sa Comelec nahimutang, aron nga makakuha og priority numbers aron nga makaapas sa deadline sa voter's registration nga unang gitakda karong adlawa, Huwebes, Septyembre 30.
Ang gipakatap nga mga awtoridad sa lugar makita nga naglisud og kontrol sa sitwasiyon, hinungdan nga pipila sa mga Covid-19 health safety protocols sama sa social distancing, nalapas sa mga tawo.
Pipila ka mga registrants online ug uban pang media reports nagpadayag sa ilang pagkadismaya sa "irregularities" ug "lack of system" sa registration sa Comelec.
Si Abogado Gay Enumerables, Comelec-Davao assistant regional director, miangkon sa paghinabi sa radyo Miyerkules sa buntag, nga bisan sa ilang kanhi kampanya sa publiko nga morehistro og sayo pa sa mga bulan una ang deadline, ila nang gilauman nga modagsa ang daghang tawo sa mga buhatan sa Comelec atol sa deadlines.
"Actually, wala pa kaayo tao ang Comelec tong mga previous months," matud pa niya sa 87.5 FM Davao City Disaster Radio.
Miangkon ang opisyal nga nakadawat sila og mga tawag nga nihangyo kon mahatagan sila og prayoridad sa linya.
"Ang singit dinha, di na pwede kay init kaayo sa mata sa mga tao nga nagpila og ala-una sa kadlawon, ala una ba o alas kwarto," tug-an niya.
Gibutyag sab ni Enumerables nga base sa ilang kasinatian sa miaging mga eleksiyon, kon dunay mga paglugway, gamay lang nga mga tawo ang mobalik sa ilang mga buhatan.
Hinuon, gilauman na sab nila nga matag deadline sa registration, duna gyuy pagguot sa mga tawo.
Tungod sa limitasyon sa tawo ug ang pagsunod sa Covid-19 health protocols nga gitakda sa nasudnong kagamhanan, gisulti ni Enumerables nga gilimitahan nila ang ihap sa transaksiyon nga iakomodar sa usa ka adlaw.
Si Public Safety and Security Command Center (PSSCC) head Angel Sumagaysay nagsulti sa SunStar Davao sa text message nga ang Sta. Ana Police Station nakigkoordinar sa Comelec isip pagpangandam sa pagguot sa mga tawo nga magparehistro.
Nagpakatap sab siya og dugang mga personahe aron nga manubay sa lugar, apil na ang pagdugang og mga ali.
Samtang gisulti sab ni Covid-19 Task Force spokesperson Dr. Michelle Schlosser sa paghinabi kaniya sa radyo nga ang maong hitabo posibleng mahimong "super spreader event," kon ang health protocols di saktong maobserbahan.
Sumala ni Schlosser nga kinahanglan nga hugtan gayud ang police monitoring aron nga maseguro nga mga health standards saktong masunod.