DUNGAN ipahigayon karon, Septiyembre 30, 2021, ang simulation exercise sa kapulisan sa tibuok nasod alang sa pag-ayuda sa proseso sa eleksiyon sa Mayo 2022.
Lakip sa pagpangandam mao ang pagtubag sa mga alarma nga motumaw nga dunay kalambigitan sa piniliay labina sa pagsugod sa pagpanawat sa Commission on Elections (Comelec) sa certificate of candidacy (COC) sa ugma, Oktubre 1.
Sa Siyudad sa Sugbo, natapos na ang table exercise sa kapulisan uban sa Cebu City Disaster Risk Reduction and Management Office (CCDRRMO), Bureau of Fire Protection (BFP), Armadong Kusog sa Nasud (AFP) ug Comelec.
Matod ni Police Colonel Josefino Ligan, hepe sa Cebu City Police Office (CCPO), ilang gipangandaman ang mga posibling mahitabo sama sa hinimoan sa mga terorista, hulga sa pagpamomba ug ang natural nga kalamidad sama sa bagyo ug linog aron masayod sila unsay ilang angayan nga buhaton.
“Mahulog man gud ni nga operational readiness nga kinahanglan nga ang atoang mga tawo permanenting andam kung adunay events nga mahitabo nga ingun ani, labi nag naay national activity nga paga buhaton like aning filing of candidacy,” matod ni Ligan.
Dugang ni Ligan, ang tumong sa ehersisyo aron masiguro nga ang kapulisan ug ubang sanga sa gobiyerno andam nga motubag kung motumaw kini nga mga scenario atol sa pag-file sa COC.
Wala mobutyag si Ligan kung aduna ba silay nadawat nga hulga, apan alang niya, kinahanglan sila nga mangandam aron dili magkagubot ang pagtubag sa alarma sa paanhon sa kampanya ug adlaw sa eleksiyon. (AYB)