WA magdahom ang bag-ong milingkod nga hepe sa kapulisan sa Central Visayas Police Brigadier General Roque Eduardo Vega nga siya ang itudlo nga Police Regional Office (PRO) 7 director.
Nasurpresa nalang siya nga gipahibawo sa iyang mga kauban nga aduna nay order nga gipirmahan ni PNP Chief Police General Guillermo Lorenzo Eleazar.
Apan bisan pa man niini, iyang gidawat ang hagit nga modala sa ryenda sa kapulisan sa rehiyon 7 nga giila nga usa sa labing gipangandoy sa tanang police officer nga dinhi madestino.
Wala mosaad og kalampusan si Vega, apan iyang tumanon ang mga programa sa Philippine National Police nga mao ang kampanya batok sa illegal nga drugas, paglimpyo sa scalawags sa hut-ong sa ilang organisasyon ug uban pa.
Dili na bag-o kang Vega ang Central Visayas sanglit taod-taod usab siya nga nahimong regional chief sa Highway Patrol Group (HPG) 7.
Makigtagbo una siya sa iyang mga staff aron ilatag ang iyang mga programa nga angay ipatuman.
Wala pa usab siyay himuon nga lahugay sa mga police officer sa rehiyon nga naghupot og mga katungdanan sanglit iya pang susihon ang mga performance niini.
“Hindi ko man ini-expect na ako ang maging regional director dito, I need to assess first. Para kasi ano yan eh, binigyan ka ng sasakyan. Di mo naman pwedeng patakbohin kaagad yan, titingnan mo muna kung lahat ng parts umaandar na maayos. So, dahan-dahan lang,” matod ni Vega.
Si Eleazar, nangulo sa turnover of command, masaligon sa kapasidad ni Vega nga modamala sa PRO 7.
Giangkon niya nga ang PRO 7 usa sa labing challenging nga assignment sa matag police officer tungod kay gawas nga malambuon ang ekonomiya dinhi, dugokonon usab kinig mga langyaw ug local nga turista.
“That is the reason why the PNP leadership is always making sure that we put the best man for his post as manifested by the recent officials assigned here as regional directors,” matod ni Eleazar.
Mando ni Eleazar kang Vega nga ibalik ang pagsalig ug respeto sa publiko ngadto sa kapulisan ug sundon ang gihimo sa iyang gihulipan nga mao ang pag patuman sa gitawag niyang “Mabilis, Matapat, May Dangal, May Integridad at May Malasakit sa ating kapwa Pilipino.”
Si Montejo mapasigarbuhon sa iyang nahimo sulod sa 10 ka buwan isip hepe sa kapulisan sa Central Visayas.
Iyang gipasigarbo ang P500 million nga balor sa illegal nga drugas nga nasakmit ug gatusan nga mga high value individual nga nadakpan sa sub-sub nga anti illegal drug operation.
Gikan sa Disyembre 1, 2020 hangtod Septiyembre 29, 2021, nikunhod usab ang index crime sa tibuok rehiyon sa 36.5 percent kun ubos kinig 1,832 ka mga kaso itandi sa susamang period sa miaging tuig.