NAKADAGAN sa sulod sa ilang balay ang usa ka security guard hinungdan nga ni-survive siya sa pagpamusil mga alas 7 pasado sa Miyerkules sa gabii sa sityo Origano Riverside, Lawaan 2, Dakbayan sa Talisay.

Wala nga paa ra ang naigo sa pagpusil kang Remejias Pansoy, 39, bisan kon gipusil siya sa makalima ka mga higayon sa nagbinugtong nga gunman samtang siya nagtan-aw sa garden atubangan sa ilang balay.

Matod ni Jonathan Tumulak, pangu sa City of Talisay Traffic Operations and Development Authority (CT-TODA), nga sila ang unang nakaresponde kay ang balay naa likod sa ilang buhatan.

Ang mga silingan ni Pansoy didto nidangop kanila hinungdan nga sila ang labing unang nakaresponde.

Matod ni Tumulak nga sa iyang pangutana kang Pansoy kon unsay motibo, wa siya masayod kay wa siyay kaaway.

Niresponde gilayon ang Emergency Medical Services (EMS) gidapatan siya og first aid una pa gidala si Pansoy sa usa ka tambalanan. (REV)