Davao de Oro gisugyot nga ipailawom sa ECQ, MECQ sa Davao City

GIREKOMENDA karon sa Department of Health (DOH)-Davao ang pagpailawom ubos sa enhanced community quarantine (ECQ) ang Davao de Oro samtang modified enhanced community quarantine (MECQ) ang Davao City gumikan sa giingong padayong pagtaas sa Covid-19 healthcare utilization rate.

Sumala ni Dr. Rachel Joy Pasion, hepe sa Regional Epidemiology Surveillance Unit sa DOH-Davao, nga anaa sa critical risk pa gihapon ang Covid-19 facility sa nahisgutang mga lugar, partikular sa Southern Philippines Medical Center sa Davao City.

Apan giingon sa opisyal nga una kini mapaabot ang rekomendasyon ngadto sa IATF, istoryahon una ang matag LGU, bisan ang Regional Inter-Agency Task Force for the Management of Emerging Infectious Disease (RIATF), ug ang Regional Task Force Against Covid-19.

Sa kasamtangan, anaa sa 78.9 percent ang utilization rate sa Covid-19 ICU sa tibuok rehiyon, 62.2 percent ang isolation beds, 62.8 percent ang ward beds, ug 52.8 percent ang utilization rate sa mechanical ventilators. (JPC/Shiela Lisondra dxRP Radyo Pilipinas)