DAVAO DE ORO -- Padayon pa nga gisubay sa Bureau of Fire Protection-Compostela ang nahitabong sunog sa Barangay Poblacion alas 2 sa kaadlawon kagahapon, Huwebes, Septiyembre 30.

Sa maong insidente, patay ang 9-anyos nga batang babaye samtang angol sab ang inahan niini nga pito ka bulan nga buntis.

Ang namatay giila nga si Pearl, samtang ang inahan mao si Maria Isabel Adlao.

Giingong miulbo ang kalayo sa videoke house nga giabangan sa mga biktima ug mikanit kini sa kasikbit sab nga videoke house nga iya sab sa igsuon ni Adlao ug lain pang puwesto nga partially damaged sa sunog.

Base sa taho nga una niulbo ang kalayo, dunay nabati nga kusog nga buto gikan sa videoke house sa mga biktima.

Nasayran gikan kang alyas Vilma, trabahante sa usa sa mga videoke house nga nahinabi sa Superbalita kagahapon nga sa dihang miulbo ang kalayo gipaningkamutan sa inahan nga si Maria Isabel nga maluwas ang anak pinaagi sa pagdala niini sa gawas sa gambalay.

Apan giingong nabuhian niya ang bata hinungdan nga naapil sa pagkasunog ug wala na mahitsura sa dihang napalgan sa kabomberohan human makontrola ang sunog. Samtang ang inahan nga buntis giingon nga nasunog ang bukton.

Wa pa masuta ang kinatibuk-ang damyos sa sunog apan sumala ni alyas Vilma nga naapil og kasunog ang duha ka token machine, lakip na ang duha ka refrigerator, duha ka ceiling fan, duha ka log fan ug kinahon nga mga beer.

Nagtuo si alyas Vilma nga ang mibuto mao ang kuryente nga maoy gituohang hinungdan sa sunog.

Patay'ng lawas sa biktima gipahiluna na sa Alar Funeral Parlor sa lungsod.