PADAYON nga tig duha ka digits na lang ang mga natala ka mga bag-ong kaso sa Covid-19 sa dakbayan sa Cagayan de Oro kada adlaw.
Sa pagkakaron, anaa sa 19,499 ang kinatibuk-ang ihap sa mga kumpirmadong kaso sa Covid-19 sa dakbayan human 47 ka mga residente ang nagpositibo sa novel coronavirus.
Sumala sa City Health Office, sa 47 ka mga bag-ong lokal nga kaso, 19 ang mga local index, lima ang mga close contacts sa mga pasyenteng nagpositibo sa coronavirus, 15 ang mga lokal authorized persons outside residence (Apors), lima ang mga Apors with link, usa ang person deprived of liberty (PDL), ug duha ang mga patay.
Ang Cagayan de Oro adunay 2,992 ka mga aktibong kaso, 569 niini na-admit sa Northern Mindanao Medical Center ug uban pang mga ospital sa siyudad, 2,406 ang mga outpatient, ug 17 ang mga ROFs/LSIs.
Nakatala usab og 212 nga nakarekober sa sakit. Anaa na karon sa 15,680 ang ihap sa mga nakarekober sa dakbayan.
Ang ihap sa mga namatay sa Covid-19 sa dakbayan anaa na sa 827.