ANG Special Investigation Task Group (SITG) nga maoy nag-imbestigar sa pag ambush patay kang manlalaban Rex Fernandez nitangtang na sa listahan sa upat ka mga personalidad nga gitumbok nga persons of interest sa krimen human nga silang tanan nikooperar na sa imbestigasyon.
Usa ka semana human sa kamatayon sa manlalaban, adunay gipangtumbok nga persons of interest ang SITG.
Kini mao ang babayeng real estate agent nga maoy kauban ni Fernandez sulod sa iyang sakyanan, driver niini ug upat ka mga opisyal sa Bamboo Bay condominium nga ginganlan sa biktima nga maoy responsable kon adunay mahitabo kaniya.
Matod ni Police Colonel Josefino Ligan, hepe sa Cebu City Police Office (CCPO) nga nakaluwat nga pinanumpaang pamahayag ang mga personalidad.
Tungod niini, giwagtang na sila sa listahan sa mga suspek.
Dugang ni Ligan nga mahimong makatabang sila sa pagsulbad sa kamatayon sa manlalaban pinaagi sa pagpahibawo sa mga imbestigador kon aduna silay makuha nga kasayuran.
Samtang daghan na usab ang nihatag og mga impormasyon sa kapulisan sa siyudad sa Sugbo human gipublikar sa social media ang video sa nagpusil kang Fernandez.
Apan ila kining gisubay pag-ayo aron masiguro nga ang gitudlo mao ang naghimo sa krimen.
“Naa tay nadawat nga mga information regarding sa personality, atong gipakatap nga video, padayon ang validation ato and hinaot nga kon willing siya nga molutang, mopakita para ma assist nato ang information,” matod ni Ligan.
Gipasalig ni Ligan nga ang tanang mohatag og impormasyon hatagan nila og proteksyon aron di usab mabutang sa peligro ang ilang kinabuhi.
Si Fernandez giatangan sa wa mailhing gunman sa Agusto 26, 2021 sa Banawa, Barangay Guadalupe, Dakbayan sa Sugbo.
Angol ang iyang drayber samtang ang babayeng ahenta na missing og pipila ka mga adlaw, apan mipatiim-aw ra sa Cebu City Police Office (CCPO) aron paghatag sa iyang habig.
Sa sinugdan, nagduda ang mga pulis kaniya kay gipangdala ang mahinungdanon unta nga mga ebidensya, labina ang cell phone ni Fernandez.
Apan nitumaw siya sa CCPO dala ang giingong mga ebidensya.
Ang upat usab ka mga tawo nagdumala sa gipuy-ang condominium ni Fernandez nga iyang gikabangi.
Bisan wa pa sila moatubang sa kapulisan, ang upat nanghimakak na sa kalambigitan sa pagpatay sa human rights lawyer.(AYB)