POSIBLING tangtangan sa lisensiya ug pasakaan og kaso ang mga professional basketball players ug mga officials nga nalambigit sa giimbestigahan karon nga game fixing sa VisMin Pilipinas Super Cup.
Gibutyag ni Games and Amusement Board (GAB) chairman Abraham Mitra nga ila nang gipasaka ang kasong kriminal sa Cebu Prosecutor’s Office niadtong Septiyembre 29, 2021 batok sa mga player ug opisyal sa ARQ Builders Lapu-lapu City Heroes ug Siquijor Mystics nga nalambigit as kontrobersiyal nga duwa sa elimination round niadtong Abril 9.
Matod ni Mitra, usa ka composite team nga gipangulohan ni GAB chief of Professional Sports Division June Bautista ang nidalikyat sa Cebu alang sa pormal nga pagpasaka og kaso human sa ilang makuti nga imbestigasyon.
Ingon ni Mitra nga napalig-on ang ilang kaso human sa pipila ka buwan nga imbestigasyon ubos sa pag-ayuda sa PNP Criminal Investigation and Detective Group ug sa National Bureau of Investigation.
Matod ni Mitra nga gusto nilang leksiyonon ang mga tawo nga nagpahimulos sa sports pinaagi sa game fixing.
Nagdumili si Mitra sa paghingalan sa ilang gikasuhan.
Sa ilang imbestigasyon, milutaw ang pipila ka mga pangalan sa mga players sa duha ka habig nga ilang gipangsuspenso.
Lakip na niini ang pipila usab ka mga sakop sa coaching staff sa duha ka team.
Gi-ban na usab ang maong team sa VisMin Cup. (JBM)