SAMA sa iyang amahan ug uyoan, kanhi varsity player usab sa eskuwelahan ang Sugboanon nga napiling Miss Universe Philippines nga si Bea Luigi Gomez.
Si Gomez, isip usa ka estudiyante sa University of San Jose-Recoletos, aktibo usab sa iyang pagka varsity player niadtong nagtungha pa siya sa kolehiyo.
Gani usa siya sa nakaduwa sa 2010 Milo Little Olympics National Finals.
Gawas sa volleyball, gikahiligan usab niya ang mixed martial arts, scuba diving ug marathon.
Nahimo niyang inspirasyon sa natad sa paugnat sa kusog mao ang kadaugan nila ni Hidilyn Diaz (weightlifting) ug Nesthy Petecio (boxing) sa Olympics.
Hinuon, sa ilang kaliwat, nagsubay sa ilang kaugatan ang dugo isip usa ka atleta, sanglit ang iyang amahan nga si Rosendo “Lokdoy” Gomez kanhi varsity player man usab sa University of Cebu (UC) basketball team kinsa nakaduwa sa mga commercial leagues dinhi sa Sugbo ug sa ubang dapit sa nasod.
Ang iyang uyoan nga si Roel Gomez, taodtaod usab sa PBA sa wala pa kini moretiro. Kanhi produkto usab siya sa University of Cebu.
Sama kang Bea Luigi, ang anak ni Roel Gomez nga si Rizzini Alexis Gomez nakasalmot na usab og mga dagkong beauty pageant competition.
Niadtong 2012, ang 5’10 nga Rizzini nakoronahan isip Miss Mutya ng Pilipinas Tourism International ug Miss Tourism International 2012.
Apan midag-om ang kalibutan sa pamilyang Gomez human nga si Rizzini nahunosan sa iyang kinabuhi sa tuig 2015 tungod sa lung cancer sa edad nga 25 anyos.
Ang iyang igsuon ni Rizzini nga si Kim Gomez, nahimo usab nga varsity player sa UC.
Si Bea Luigi Gomez maoy morepresentar sa nasod sa 70th Miss Universe pageant nga ipahigayon sa Eilat, Israel karong Disyembre. (JBM)