DI matukib ug masabot ang bation sa mga bag-ong ginikanan panahon nga magbati o moabot na ang ilang dugay nga gipaabot labi na og pirmiro pa kining nakasuway og panganak.
Normal ra nga magsagol ang bation sa mga bag-ong ginikanan gikan sa kalipay, ka-excited, ngadto na sa kahadlok ug kaguol human nila makita ilang prosusong liwat. Apan dunay uban nga masubrahan unya nipaingon sa depresyon.
Matod sa Mayo Clinic, kasagarang mga bag-ong na-inahan makasinati og postpartum o ‘baby blues’ human sa paghimugso sama sa kalit nga paghilak, tukartukar nga sapot, pagkiritabli , makasinati og tumang kakapoy o bug-at sa lawas, way klarong konsentrasyon, focus o desisyon.
Ang uban sab magul-anon, mawad-an na og gana sa pagkaon, mawad-an og pag-asa sa kinabuhi, ma-uwawon, daling ma-panic, maglisod og katulog (insomnia) o magpunay ra sab hinuon og katulog.
Kining baby blues magsugod sa pirmirong 3 ka adlaw human sa pagpanganak unya usahay molungtad og 2 ka semana apan dunay uban nga nagrabihan unya maabtan pa og binuwan o tuig.
Human ang inahan manganak, automatic nga moubos pag-ayo iyang hormones (estrogen o progesterone) sa lawas nga usa sa mga rason sa depresyon. Ang uban sang hormones gikan sa thyroid glands moubos sab maong bation sa tagtungod ang tumang kakapoy ug luya.
Unya kung magbinali ang bata sa pagkatulog, ang inahan nga maoy mangunay sa pagpasuso ug pagbantay magminanok sab og katulog maong maglabad ang ulo, iritabli ug saputon.
Makapasamot sab ka-insecure ang kahadlok nga di na mabalik ang kanhing porma sa sexy nga lawas ug kaanyag.
Ang uban nga di maabagan og sayo dilikadong makahuna-huna og dautan sama sa pagpakamatay o pagpahimungot sa bag-ong natawo.
Kung kini mahitabo, pangayo gilayon og tabang sa mga health care professionals o mental care professionals.
Makatabang sab kung moduol ug makig-kukabildo sa mga suod nga higala, kapamilya o spiritual leaders (pastor, pari o ministro) para makapahungaw sa gibati ug matambagan.