TAGSA lang ka botelya sa ilimnong makahubog matag tawo ang gitugot nga mapalit sa mga tindahan og establisimento sa Lungsod sa Moalboal subay sa paglibkas na niini sa liquor ban.
Kini maoy bag-ong kamandoan nga giluwatan ni Moalboal Mayor Paz Rozgoni sa Oktubre 1, 2021.
Subay sa lagda sa mayor, dili pwede ang pagsawo sa baso ug botelya sa ilimnon sa mga manginom.
“Each person must use his or her own drinking glass at all times,” sigun sa Executive Order No. 33.
Kon man gani dunay plano nga magtapok, gikinahanglan nga istriktong motuman sa physical distancing, dili usab pwede magsawo og utensils sama sa kutsara ug tinidor ingon man plato.
Ang masakpan nga molapas sa maong kamandoan pamultahon og P20,000-P50,000 o mabilanggo sulod sa unom ngadto sa usa ka tuig.
Gitahasan usab ni Rozgoni ang tanang sakop sa kapulisan sa lungsod sa istriktong pag-monitor ug pagpatuman niini. (ANV)