MOKABAT sa P41 milyones nga kantidad sa ginadiling drugas ang nasakmit sa mga sakop sa City Intelligence Unit (CIU) sa Lapu-Lapu City Police Office sa managlahing operasyon sa Dakbayan sa Lapu-Lapu kagahapon Oktubre 1.
Unang operasyon sa kapulisan gipahigayon pasado sa 2:00 sa hapon sa Sangi Road, Barangay Pajo nga gibana-bana nga moabot sa P14 milyones nga kantidad sa ginadiling drugas nga motimbang ug duha ka kilo.
Ang maong sinakmit nga gituohang shabu gikan sa dinakpang si Esterlita Torrejos Millanes, 40, taga- Sityo Matumbo sa Pajo, kinsa giila nga usa ka high value individual (HVI) sa kapulisan.
Sa mga 4:00 sa hapon sa maong adlaw gilusad usab sa kapulisan ang ikaduhang operasyon sa Sityo Mustang, Barangay Pusok nga niresulta sa pagkasakmit sa P27 milyones nga balor sa ginadiling drugas nga mitimbang ngadto sa upat ka kilo.
Ang maong ebidensiya nakuha gikan nila ni Reny Dente Nabor, 48, taga-Victoria, Northern Samar, ug Rhodora Diaz Dayuja, 50 taga Tagbungaga, Northern Samar.
Ang duha adunay address sa usa ka subdivision sa Barangay Langtad, Dakbayan sa Naga.
Matod ni Police Colonel Arnel Banzon, director sa Lapu-Lapu City Police Office nga ang duha ka operasyon dili konektado.
Apan sa kadako sa kantidad nga nasakmit gikan sa ilang posisyon dako ang posibilidad nga adunay nagpaluyo nilang mga dagkong drug group o drug personality.
Milutaw ang mga pangalan sa dinakpan human sa milabay nila nga mga dakop sa ginadiling drugas sa dakbayan.
Suta-on pa sa kapulisan kinsay source sa maong mga ginadiling drugas apan dako ang posibilidad nga gipalusot kini sa Sugbo gikan sa laing lugar.
Susihon usab nila ang tag-iya sa sakyanang gisakyan sa mga dinakpan kansang plate number naka-rehistro didto sa kaulohan.
“Mao ni ato pasabot sa na-involved aning illegal nga drugas nga sunodsunod ang accomplishment sa LCPO so ug mosud ka ana di gyud na matago diri sa Lapu-Lapu,” matod ni Banzon.
Sila si Nabor ug Dayuga pulos giingong way kasayuran sa ginadiling drugas ang ilang dala nga gisulod sa travelling bag.
Matod pa igo ra sila gisugo sa pagpahatod niini sa Lapu-Lapu apan nagdumili na pagluwat ug pamahayag kon si kinsa maoy nagsugo kanila.
Si Lapu-Lapu City Mayor Junard Chan, sa iyang bahin, kinsa dali nga niadto sa dapit diin nadakpi ang mga suspek, ang mapasalamaton sa walay puas nga kampanya sa kapulisan batok sa ginadiling drugas.
“Sukad sa akong paglingkod makita nato nga daghan na og dagko nga illegal drugs ang nasakmit nato kay ang atong pulis wala matulog,” matod ni Chan. (GCM)