Panagsangka batok sa duha ka mga dagkong kompaniya maoy modayan-dayan sa dihang sugdan na ang best-of-seven semifinals round karong hapon sa 2021 PBA Philippine Cup Final Four sa Don Honorio Ventura State University Gym sa Bacolor, Pampanga.
Kini human nga hingpit nga gipalagpot sa Meralco Bolts ang sister team Nlex Road Warriors, 97-86, aron pagsakmit sa katapusang luna sa semis niadtong Biyernes sa gabii, Oktubre 2, 2021.
Sa kadaugan nga maoy nagsilbing panimalos sa ilang kapildihan niadtong Miyerkules, ikaatbang sa Bolts ang no.3 nga Magnolia Hotshots, ang team nga misagunson pagpukan sa Rain or Shine sa quarterfinals.
Ang kalantip ni Chris Newsome maoy mipatugbabaw sa kagabhion human kini mipabaha og 23 puntos, siyam ka rebound ug pito ka assists aron pangulohan ang Bolts.
Miabag kaniya sila si Cliff Hodge ug Anjo Caram nga may tag 16 matag usa samtang 11 puntos ang natampo sa beteranong si Reynel Hugnatan nga itukmod ang Bolts ngadto sa ikaduhang sunodsunod nga pagtaak sa all-Filipino semis.
Ang laing kombati sa semis naghubit usab sa panagtigi sa laing duha ka mga higanting team - ang top seed TNT Tropang Giga ug ang no.4 seed nga San Miguel Beer.
Pasabot nga ang upat ka mga teams nga miabante sa semifinals nagagikan sa korporasyon ni Manny V. Pangilinan - Meralco ug TNT - samtang ang laing duha - Beermen ug Hotshots pulos usab teams sa San Miguel Corporation ni Ramon Ang.
Batok sa Bolts, ang Magnolia, sa naandan mosandig sa triangulo sa beteranong si Paul Lee, Calvin Abueva ug Ian Sangalang kinsay maoy mga responsabli aron ilang maabot ang laing ang-ang sa semis.
Apan ang nagdagkot og dugang kahinam sa seris mao kining kombati nga susama og championship showdown tali sa duha ka mga flagship squad sa lega.
Ang San Miguel Beer nga gibituonan sa higanting Sugboanon nga si June Mar Fajardo ug ang TNT Tropang Giga nga serbisyohan usab sa laing Sugboanon nga si RR Pogoy.
Lab-as pa sa panumdoman nga ang TNT maoy mipalagpot sa defending champion Barangay Ginebra sa quarterfinals, butang nga wala ikahimuot sa Beermen, ang sister team sa Gin Kings.
Si SMB coach Leo Austria sayod unsa kalisod ikaatbang ang TNT nga ning higayona ubos na usab sa pagdumala sa beterano ug multi-titled ug kanhi Gilas Pilipinas coach Chot Reyes.
Gawas ni Fajardo, si Austria makasalig usab sa iyang ubang mga beteranong batos nga gilangkuban nila ni CJ Perez, Mo Tautuaa, Marcio Lassiter, Arwind Santos, ug Alex Cabagnot.
Giangkon man tuod ni coach Chot Reyes ang malisod nga tahas, apan alang kaniya ang saktong preparasyon ang hait nga hinagiban nga ilang kasandigan.
"We just beat the defending champion, but San Miguel is like what, the five-time champion before Ginebra won it last year," matod ni Reyes. "San Miguel kicked our butts in the elimination round. It wasn't even close. They beat us, and they beat us badly.
Apan masaligon siya nga mao na kining higayon nga ipakita sa Giga ang ilang kalidad ilabi na kay sagad sa iyang mga injured players ang hinayhinay nang naka recover.
Gipaabot nga moabag ni Pogoy sa opensa si Jayson Castro, Troy Rosario, Micky Williams ug Poy Erram nga maoy modumala sa ilawon nga bahin. (JBM)