Giingong gate crasher namatay human gipusil sa iyang kasinumbagay nga wala makadawat nga nalupig sa alas 5:30 sa kadlawon sa Biyernes, Oktubre 1, 2021 sa Purok Avocado, Sitio Salay, Brgy. Butong, lungsod sa Ronda, Sugbo.
Ang biktima giilang si Aquilino Rabusa, Jr., 27, ulitawo, machine operator National Grid Corporation of the Philippines (NGCP), taga Brgy. Tumonoy, lungsod sa Moalboal.
Si Rabusa nakaangkog samad pinusilan sa ilok ug dughan human pusila ni Gil dela Torre Suarez, 31, minyo, taga Barangay Butong sa nahisgutang lungsod.
Nisurrender si Suarez sa kapulisan alas 11:30 sa buntag sa Biyernes.
Si Police Staff Sgt. Josephus Diana sa Ronda Police Station nga nahinabi sa Superbalita Cebu nagkanayon dunay birthday sa maong dapit.
Sila si Rabusa ug Suarez uban sa mga silingan nagtagay.
Dihang nangahubog na, nagkalalis kabahin sa isyu sa pamilya, trabaho, ug uban pa.
Gumikan sa pag-init sa panaglalis, nahitabo ang sinukmagay tali ni Suarez ug Rabusa, apan nalupig ang nahauna.
Si Suarez wa wala makadawat nga nalupig sa sumbagay.
Si Rabusa nga natulog sa barracks niadtong higayuna hilom nga giduol ni Suarez, mipusil sa kilid sa lawas ug dughan.
Nagdali sa pagbiya si Suarez sa maong dapit apan siya nakit-an ni Ancero Mirafuentes, silingan.
“Ang sulti ni Mirafuentes, nakadungog siyag sipang buto, nakalingi siya, nakit-an ang suspek nagti-on sa armas ngadto sa biktima unya daling mibiya,” dugang ni Diana.
GATE CRASH
Si Suarez nga nahinabi sa Superbalita Cebu hugot nga nanghimakak sa kremin.
Gibutyag niya nga birthday sa ig-agaw sa iyang asawa ug nag-lechon, unya nagtagay sila uban sa mga kabanay.
Si Rabusa uban sa ilang silingan hubog nang daan, kalit nga niabot bisan wala imbetara.
Naikog si Suarez, siyay mi-abi-abi kang Rabusa ug sa silingan nga kuyog.
Si Suarez nagkanayon nga siya ang nagkupot sa pitsel, kay siyay nag ganer sa gitagay nga ilimnong makahubog.
Naglami ang tagay, daghan silang nahisgutan, apil ang pulitika, hangtud nga naabot sa pamilya.
Sila si Rabusa ug laing kauban maoy unang nagkonprontasi.
Human ini, usa nila nipadayag nga mas makaayong unahon nila pagtagad ang ilang pamilya kay sa ubang mga problema.
“Ako silang gibadlong nga ayaw mo diri paglalis kay dili ni inyuhang panimalay, maikog ta! Kon gusto mo adto mo sa unahan pagsinumbagay,” dugang ni Suarez.
Nasuko si Rabusa, mibuhig pulong nga “wala ko mahadlok ninyo bisag taga dinhi mo.”
Naglagot si Suarez, iyang gipusposan og pitsel ang ulo ni Rabusa hinungdan nga nahitabo ang lamok-lamok ug nagkasinumbagay silang duha.
Gani gitabangan pa siya sa mga kuyog ni Rabusa.
Si Suarez niangkon nga lupig siya ni Rabusa kay makamao manumbag, dako usab kini.
Pero nahuman ang kagubot human silag giuwang.
“Lagot ko kay wala may mga batasan, wala sila imbetara! Akoy nag-ganer sa tagay, asikaso nila pagpakaon, letson, kaldiritas, ug paklay kanding unya pahaba kaayog sinulti-an,” asoy ni Suarez.
Ang suspek midepensa nga di siya maoy nipusil kang Rabusa kay milakaw siya aron mangumpay para sa mga binuhing hayop. (GPL)