Pipila ka mga semana ang nakalabay, gipahibawo sa Cebu-Cordova Link Expressway management nga ilang libreng paagian ang third bridge alang sa mga magbiseklita. Duna silay ibutang nga lane nga tag 1.5 metros sa duha ka mga habig sa bridge.

Maanindot ni nga kalambuan alang sa mga siklista nga tig-adto sa Cordova o sa dakbayan sa Lapu-Lapu. Apan daan nang nagpahimangno ang management nga dunay higayon nga hayan di paagian sa mga siklista ang taytayan, sama sa dautang panahon.

Mas luwas baya ning bike lane sa third bridge kay separate siya sa agian sa mga sakyanan. Di sama sa unang duha ka bridges nga way bike lane mao nga makig-ilog ang mga siklista tali sa ubang mga sakyanan. Wa pa ko kahinumdom nga dunay major nga aksidente nga naglambigit og biseklita sa duha ka bridges.

Bisan pa kon wala, ang gihimo sa management sa CCLEX angay kaayong daygon. Angay gani kini nga sundon sa motukod sa ikaupat nga bridge nga naa pa sa planning stage. Kon nabuhat ni alang sa third bridge, nganong di man mahimong kopyahon sa ikaupat nga bridge?

Karong panahuna, ang biseklita integral part na sa transportasyon, bisan kon mahuman na ang pandemic pipila ka mga tuig gikan karon. Busa, ang bag-ong mga road network, gawas sa sidewalk, kinahanglan dunay lane nga ibutang alang sa mga biseklita.

DURABLE

Kon mag road o mountain bike ka nga motadlas sa mga dapit nga tangason ug dulhogon, seguradoha nga ang tanan nga importanteng parts lig-on, di mo malfunction, sama sa brakes, ug di maputol ang imong kadena samtang magsubida.

Mas mahal ang imong brake ug kadena, mas segurado ni nga durable. Basta brake set gani, di ko kuripot. Mopalit ko og Shimano Deore pataas nga series kay nasayod ko nga masaligan ni nga system base sa akong experience ug sa mga cyclist nga akong gikahibag. Bisan sa mga downhill racing, mao ni ang sagad nakong nakita nga gipangtaud sa mga biseklita.

Gihisgutan ko ni tungod sa mga insidente sa disgrasya nga naglambigit sa pagpaltos sa brakes sa bike.

Nakasuway na ko og V-brake sa akong pagsugod. Kuwang ra siya og stopping power busa, nibalhin ko sa mechanical disc brake. Tinuod, naa dayon ang power sa brake, apan itrapo ka sa karsada. Mao ni ang nahitabo sa akong manghod nga nakaangkon og pangos human matukalbong sa bike kay nalab-anan og kumot ang brake.

Busa, nibalhin ko sa hydraulic brake nga maanindot kay medyo inanay ang pagpahunong sa biseklita ug di dali nga mobato. Mas luwas ni kay sa mechanical disc brake ug maayo og stopping power.

Kon baratuhon ka og kadena, kalagmitan dali ning maputol. Ayaw kog sultihi nga dili kay kadaghan na ko nakasugat og bikers nga naputlan og kadena kay nagbarat.

ROAD SAFETY

Kon mosikad ka, timan-i kanunay ang road safety, di lang alang nimo, kon di sa tanang tawo nga naa sa karsada. Kon ikaw magmatngon, dako ang kahigayunan nga malikayan ang mga disgrasya.

Kon dunay bisan usa lang nga magpasagad, paabutang dunay maaksidente. Sagad ani naa sa mga nagmotorsiklo.

Huna-hunaa lagi, ang imong sakyanan maorag pusil, kon magpasagad ka, kini makaangol o makapatay.