Mongaya: Kinsay magpapili?

Karong semanaha na kita masiguro kon si kinsa ang magpapili karong umaabot nga piliay. Mao kana sila ang mosang-at gyud sa ilang certificate of candidacy kun COC.

Alang sa pagka presidente, nasiguro na kita nga modagan gyud si Bise Presidente Leni Robredo ug Sen. Manny Pacquiao.

Kagahapon, atong nasayran gikan mismo sa nisugat sa MCIAA alang sa certificate of nomination and award (CONA) alang sa Liberal Party (LP) nga si VP Leni nakadesisyon na nga modagan. Mao nga dinhi sa Sugbo, nagtakda na og mga miting ang mga grupo nga mosuporta kaniya.

Akong gilantaw nga si Bise Gobernador Junjun Davide mismo ang mokampanya alang kang Leni inabagan nilang Bimbo Fernandez sa Pagtambayayong ug Mocring Barcenas nga lider sa Liberal Party.

Si Davide nga magpasubli isip usa ka independente nga kandidato kaalyado ni Sec. Ace Durano nga modagan pagka gobernador batok kang Gob. Gwen Garcia.

Sigurado na sab kita nga modagan si Sen. Manny Pacquiao alang sa pagka presidente. Matod pa, Basta Promdi, Manny.

Sa miaging semana, nakita nako ang kakugi sa partidong Promdi nga gipangulohan karon ni Mimo Osmeña sa pagrekrut og mga sakop labi na sa Sugbo diin akong nasabtan nga maoy modala sa kampanya ni Pacquiao dinhi sa Sugbo.

Ang atong higala nga si kanhi Board Member Joeyboy Holganza mao sab ang regional chairman sa PDP-Laban faction nga gipangulohan ni Sen. Koko Pimentel. Mao kini ang faction nga nagsuporta kang Pacquiao. Ang pikas faction mao ang giingong faction ni Energy Secretary Alfonso Cusi, Sen. Bong Go, OPAV Mike Dino, ug Presidente Rodrigo Duterte.

Di ko makalimot nga kaniadtong batan-on pa, nagkuyog sa selda panahon ni diktador Ferdinand Marcos ang mga amahan nilang Joeyboy ug Koko nga silang Dodong Holganza ug Nene Pimentel.

Nakasiguro na sab kita nga mosunod sa pagsang-at sa ilang COC mao si Yorme Isko Moreno, kanhi senador Bongbong Marcos, ug Sen. Ping Lacson.

Dinhi sa Sugbo, naay duha ka mga parallel groups nga nagsuporta kang Isko Moreno nga gipangulohan sa lain natong mga higala nga sila si Nick Malazarte ug brodkaster nga si Edward Ligas.

Happy birthday diay ni Barangay Konsehal George Chang nga usa ka lider ni Isko dinhi sa Syudad sa Sugbo. Atong naabtan sa iyang selebrasyon silang Maria Pino sa CCUVA ug kaubanan.

Samtang nasiguro ko nga modagan gyud kini sila, apan daghan ang nag-atang kon mosang-at ba gyud sa ilang COC si Davao City Mayor Sara Duterte-Carpio.

Alang kanako, di modagan si Sen. Bong Go nga naa sa PDP-Laban Cusi wing. Mas mahurot pa iyang panahon karon paglihay sa nagka grabing iskandalo kabahin sa Pharmally.

Apan aktibo karon sa politika sa Sugbo si presidential assistant Mike Dino nga nagtabang ni Gob. Gwen Garcia sa pagpalig-on sa One Cebu nga nagsuporta kang Sara Duterte.

Atong nadunggan nga dako ang tabang ni Dino nga motapon ang mga Calderon sa 7th district ug nilang Caminero sa 2nd district sa kampo sa One Cebu. Kining Partido ni Gob. Gwen kaalyado sa PDP-Laban Cusi Wing.

Daw murag 2004 scenario ang nahitabong bugno sa pagka gobernador sa Sugbo kay si Gwen Garcia ug ang nitumaw nga iyang kaatbang nga si kanhi Secretary Ace Durano pareho mang nagsuporta kang Sara Duterte.

Si Durano diay ang regional party chairman sa bag-ong nitumaw nga Partido Pilipino alang sa Pagbabago (PPP) nga nagsuporta sab kang Inday Sara.

Atong malantaw nga sa nasyonal, moguwa puhon nga bisan pa man og daw patas ang mga kandidato alang sa pagka presidente, moepekto gyud kining imbestigasyon sa dakong pangurakot sa Pharmally diha sa kandidatura ni Inday Sara.

Ang pangutana lang nako, kinsa kahay makabenepisyo sa iyang mga karibal? Hisgutan nato kin isa umaabot nga mga lindog. (DM nako sa @anol_cebu)