Ang Department of Education (DepEd)-Cebu Province nagpadayon pa sa ilang pagpangandam alang sa pagbukas sa ilang tulo ka mga eskwelahan nga gi-aprobahan sa ilang central office nga makapahigayon sa face-to-face classes.
Kini ang gibutyag ni DepEd Superintendent Marilyn Andales, kinsa personal nga nibisita ug nitagbo sa mga magtutudlo sa Pilar National High School sa lungsod sa Pilar sa Camotes, Oktubre 1, 2021.
Isunod niya pagbisita ang Samboan sunod semana aron susihon ang pagpandam sa mga magtutudlo sa Basak Elementary School.
Ikatulong eskwelahan nga apil sa pag-abli mao ang Luyong Baybay Elementary School sa Bantayan islands.
Ang mao nga mga dapit sa lalawigan pulos mga low risk sa Covid-19.
Kon way laing mga kakulian, hayan makasugod ang face-to-face classes sa Lalawigan sa Sugbo sa tunga-tunga-tunga sa Nobiyembre ning tuiga.
Ang Pilar, mga isla sa Camotes adunay 13,000 nga populasyon ug wala nay aktibong kaso.
Giangkon ni Andales nga nagpadayon pa ang ilang preparasyon ug dili pa usab bakunado batok sa Covid-19 ang tanan nilang magtutudlo hinungdan nga iyang gidasig uban sa awhag sa mga mayor sa ilang lungsod nga magpabakuna na.
Ang mga magtutudlo nga dili magpabakuna mahimo gihapong makatudlo apan dili sa face-to-face inay adto sila idestino sa mga module sa mga bata para walay mahitabong contact.
Ang mga magtutudlo ug mga tinun-an kinahanglan nga magsul-ob og face mask ug face shield panahon sa klase.
Matod pa niya nga ang DepEd higpit nga makig-alayon sa mga local government unit (LGU) sanglit sila ang kaabag alang sa kalampusan sa implementasyon sa face-to-face classes.
Sila gipasaligan na sa hingtungdang mga LGU nga ilang suportahan ang pilot testing sa pagbalik sa new normal nga pag-eskwela.
Adunay gibanabana nga 626 ka mga tinun-an ang tulo ka mga eskwelahan, diin 50 poryento ang ilang ipatuman nga capacity.
Ang mga tinun-an bahinon sa duha ka mga hut-ong, adunay Lunes-Miyerkules ug Martes-Huwebes aron maka-eskwela ang tanan.
Sa classroom, 20 na lang ka mga tinun-an ang makatambong sa klase 40.
Gibanabana ni Andales nga kon walay mga kakulian ug masubay ang tanan sa plano, sa unang o ikaduhang semana sa Nobyembre, makasugod na sila sa face-to-face classes.
Ang DepEd aduna pay pamaliton nga mga personal protective equipment (PPE) sama sa face shield ug face mask aron maoy gamiton sa mga eskwelahan. /
Apil sa pamalitong mga kahimanan mao ang alang sa temperature check, handwashing facility, alcohol ug uban pa nga gikinahanglan nilang kumpletohon lakip na ang set-up sa ilang mga classroom para mabatokan ang pagkatap sa Covid-19.