NAGMINGHOY sud sa selda sa Digos City Police Station ang duha ka mga lalaki kinsa naaktuhan sa kapulisan nga nagpasabong og manok pasado ala una sa hapon niadtong Oktubre 2, 2021, atol sa anti-illegal gambling operation sa Intel-City Drug Enforcement Unit (CDEU).
Gipangunahan ang operasyon ni Police Lieutenant Colonel Vici Anthony Tababa, hepe sa Digos City police, diin ilang girumbo ang Purok 4, Barangay Aplaya, Dakbayan sa Digos human nga nakadawat sila og impormasyon labot sa pasabong.
Gipang-ila sa Digos City police ang duha ka mga dinakpan nga sila Lino Delosa Pahac, 62, ug residente sa Purok 4, Barangay Alaya, Digos City; ug usa ka Adonis Antipuesto Escuadro, 44, ice cream vendor, ug nagpuyo sa Chapter 6, Barangay Aplaya, Digos City.
Naatlan gyud sa mga pulis ang mga nahisgutan ug nakuha sa ilang posisyon ang pito ka mga manok pangsabong; usa ka bihag, duha ka bulang, P200 nga pusta ug uban pang mga gambling paraphernalia.
Kabahin lamang kini sa pagpakusog sa kampanya sa kapulisan batok ilegal nga sugal sa Dakbayan sa Digos. (Jeepy P. Compio)