Mikabat ngadto sa 25 ka mga molupyo sa Barili nga mga estudyante sa Technical Education and Skills Development Authority (Tesda) ang migraduwar sa kursong driving nga nahatagan na sa ilang sertipiko niadtong Septiyembre 27, Lunes.
Si Barili Mayor Julie Flores mihangop sa maong proyekto sa Tesda nga siyento por siyento usab nga gisuportahan sa local government unit (LGU) sa nahisgutang lungsod.
“Ang atong partnership between LGU-Barili and Tesda nagpadayon and where infact daghan na kaayo tag project karon nga initiated by Tesda and supported by our administration. Kining NC II for driving, kato ato gitagaan og mga tool kit mao toy atong mga first batch. Naa pa tay mga second batch. Duna tay mga speed sewing, massage, heavy equipment operator, welding ug uban pa,” matod ni Flores.
Gibutyag sa mayor nga ubay-ubay na nga project o programa sa Tesda nga anaa sa Barili nga iyang gisuportahan taliwala ning kalisod nga giatubang karon.
“Atong gidawat nga mga project ug programa sa Tesda nga naa dinhi sa Barili kay open man gyud ta bisan pa sa pandemic nagpadayon ang atong training sa atong mga kaigsuonan.”
Sa samang higayon, giawhag ni Mayor Flores ang mga ginikanan sa pag-agni sa ilang mga anak nga mopa-enroll niining gitanyag sa Tesda bisan pa man ning nagpadayon nga pandemiya.
“Nagtuo ko nga mahaw-as ra ta ani nga sitwasyon ug inig kahaw-as nato, nagtuo sab ko nga ang atong mga kaigsuonan skilled na sila. Andam na sila nga mo-apply og trabaho,” dugang sa mayor.
“Ang nakaayo niini kay nag-possess sila og national nga sertipiko. So, og mangaplay ta og trabaho, way certificate ug naa, advantage gyud ang dunay certificate. So mao nay nakalahi,” pasabot ni Flores.
Si Engr. Ricardo Davidon, center administrator sa Tesda 3rd District, kinasingkasing nga mipasalamat ni Mayor Flores sa suporta nga gihatag niini sa ilang proyekto.
Ingon niya nga daghan nang mga lungsod sa ikatulong distrito ang nahatagan nila og mga proyekto apan ang munisipalidad sa Barili maoy nahimong piloto sa ilang mga proyekto karong tuiga.
“Third District atong coverage, usa ang Barili sa atong natagaan. Sa scholarship sa 2021, ang Barili maoy pilot. Before daghan na ming nahatagan nga mga lungsod,” ingon ni Davidon.
Sa 25 ka mga nigraduwar sa driving course, tulo niini mga babaye. Ang mga estudyante gipaubos sa training sulod sa 19 ka mga adlaw ug aduna pay allowance nga P160 matag adlaw.
Hinuon ang dawaton mao lang kadtong nakagradwar na sa high school.
Giklaro ni Davidon nga ang ila mao lang ang training ug wala silay labot sa paglukat og lisensiya niini.
“Puwede na ni sila manrabaho na. NC II holder na sila. Katong ilang trainer nga registered man to sa LTO, so katong mga way lisensiya puwede nato silang mo process thru sa among mga trainers,” padayag ni Davidon.
Sanglit napanglantawan ni Flores nga dako kini og ikatabang ngadto sa mga kabus niyang konstituwente sa lungsod, tinguha karon sa mayor nga kini ipahigayon na matag tuig. (PR)