Ni-file sa certificate of candidacy (COC) sa pagka kongresista sa Cebu City North District ang aktor nga si Richard Yap ubos sa National Unity Party (NUP) kagahapon, Oktubre 3.
Apan ang iyang asawa nga si Melody maoy nisumiter sa COC human ang aktor ug negosyante naka-lock-in sa usa ka shooting sa GMA Network sa kaulohan.
Si Melody nipakita og special power of attorney (SPA) ngadto sa Commission on Elections (Comelec) aron mahimong balido o legal ang pag-file sa asawa alang sa kandidatura sa iyang bana sa north district, ang distrito nga gihuptan sa taas nga panahon ni anhing Kongresista Raul del Mar, diin kasamtangang gihulipan sa iyang anak.
Laing artista usab ang nisuway sa pagkandidato sa maong distrito nga si Anabelle Rama apan pakyas sa pagsakmit sa pwesto gikan sa amahana nga del Mar.
Samtang sa sayo pa, nipadayag og suporta ang grupo sa Barug Katawhan Dakbayan kun Barkada pinaagi sa pag-endurso kang Yap nga maoy paluyohan nga pagka kongresista sa norte sa dakbayan.
Ang Barkada grupo sa mga kagawad nga taga norte nga aktibo sa milabayng 23 ka tuig.
Samtang, nasayran nga ang Barkada mosuporta sa partido ni Mike Rama uban sa bise mayor ug mga konsehal.
Dugang sa grupo nga Bakada nga si Manila Mayor Isko Moreno maoy ilang suportahan sa pagka presidente sa 2022 nga eleksyon. (Alan Tangcawan)