WA KO masayop sa akong pangagpas sukad pa kaniadto nga modagan pagkapresidente si Davao City Mayor Sara Duterte-Carpio, ang anak ni Presidente Rodrigo Duterte, nga matud pa sa iyang mga komedya ang iyang gikahadlokan nga anak. Aron modagan si Mayor Sara pagka presidente, di namo padayon og dagan pagka bise president si Presidente Duterte.
Si Senador Bong Go, nga maoy gituboy sa PDP-Laban Cusi faction nga modagan pagka president maoy mipuli ni Presidente Duterte nga kandidato pagka bise presidente. Sa wala pa mosulti si Presidente Duterte, nga iyang padaganon pagka president si Mayor Sara ug si Bong Go bise presidente, kusog kaayo ang hungihong nga ang mag-uban mao si Bongbong Marcos (BBM) ug Sara. O, di ba Sara-BBM.
Hinuon, di pa mahibaw-an unsay tinuoray nga bahig sa administrasyon kay kutob pa man sa Oktubre 8, ang katapusan nga adlaw sa pagsumitir sa sertifiko de kandidatora sa mga kandidato sa piliay sa Mayo 9, 2022. Si Bong Go pa ang misumitir sa sertifiko de kandidatora pagka bise presidente.
Sa oposisyon, si Senador Manny Pacquiao ang nag-una nga misumitir sa iyang sertifiko de kandidatora pagka presidente ug ang iyang kandidato pagka bise president nga si Party List Representative Lito Atienza. Si Pacquiao nagpaubos sa partido Promdi ni kanhi Governor Lito Osmeña. Tungod ani, gipalagpot si Pacquiao sa PDP-Laban Cusi wing.
Wa motubag si Mayor Sara sa mga pangutana sa sakop sa media human nga gianunsyo ni Presidente Duterte nga padaganon siya pagka presidente ug si Bong Go ang iyang bise presidente. Ang mga dumadapig ni BBM nahingangha dihang gianunsyo ni Presidente Duterte nga si Sara ug Bong Go ang iyang kandidato pagka presidente ug bise presidente.
Atong mahinumduman nga miingon si Mayor Sara nga usa ra sa Duterte ang modagan sa hataas nga posisyon sa sunod nga piliay. Tinuod man, si Presidente Duterte, nga usa ka amahan ug husto na sa edad iyang gipalabi ang iyang anak nga maoy modagan pagka president sa sunod tuig nga piliay.
Pero sa akong tan-aw, ang administrasyon ug mga lider sa oposisyon karon morag nagduwa og poker. Di pa modiga dayon sa ilang baraha. Hinumdumi nga sa Nobembre 5 mahimo pa nga mag-ilis o magpuli ang mga kandidato. Nahitabo bitaw ni kaniadto sa pagdagan ni Presidente Duterte, nga nagdiki-diki siya tungod kunohay kay wala siyay kwarta apan pag-abot sa oras iyang gipulihan si Martin Dino, nga maoy nisumitir sa sertifiko de kandidatora pagka presidente, nga karon undersecretary sa DILG.
Wa ko motuo sa mga storya nga dili modayon og dagan si Mayor Sara pagka president tungod sa rason nga hapit tanan mga mayor sa Mindanao mipirma na og kasabutan-suporta alang sa iyang kandidatora sa pagka presidente. Sa among probinsya sa Surigao del Sur, si Gob. Alex Pimentel, nga magpasubli pagka gobernador, ug ang mga mayor sa dakbayan ug lungsod naa modagan ubos sa Hugpong ng Pagbabago ni Mayor Sara.
Kon mao na gyud ni ang bahig sa administrasyon, modagan pa ba kaha si BBM pagka presidente? Miingon man gud si BBM nga dili siya makig-atbang og Duterte.