DAGHAN ang nasubo. Ubay-ubay ang nagmahay ug mas daghan ang nalibog sa panghitabo sa politika karong panahona.
Niadtong Oktubre 1, unang adlaw sa pag-file sa Certificate of Candidacy (COC) sa mga kandidato, gisumite ni Presidente Rody sa Comelec ang iyang COC isip Vice President ubos sa PDP-Laban Cusi wing.
Nag-file usab sa ilang tagsa-tagsa ka kandidatura silang Senador Emmanuel "Manny" Pacquiao pagka-pangulo ubos sa Probinsya Muna Development Initiative-Partido Demokratiko Pilipino (Promdi-PDP) Coalition ug sila ni Manila Mayor Francisco "Isko Moreno" Domagoso ug iyang ka-tandem nga sikat nga internet blogger nga si Dr. Willie Ong.
Apan sa paglabay sa usa ka adlaw, gibalita nga gidala ni PRody mismo didto sa buhatan sa Comelec si Senador Lawrence Christopher "Bong" Go aron mo-file sa iyang kandidatura pagka-Vice President samtang gi-withdraw niya ang unang certificate of candidacy (COC) pagka-bise presidente. Nakugang ang tanan kay si Sen. Bong Go maoy napiling "standard bearer" sa PDP-Laban Cusi wing samtang si PRody ang Vice President. Hangtud karon, wa pa naka-unite ang kampo sa oposisyon nga 1Sambayan kung kinsa ang ilang manok kay wala pa makadesisyon si Vice President Leni Robredo sa Liberal Party.
Ug samtang nagkagubot ang tanan, mas nisamot ang kalibog tungod kay gibalita sab nga ni-file sa iyang COC si Mayor Sara Duterte-Carpio, dili pagka-presidente apan pagka-mayor sa ikatulo niini nga termino dinhi sa Davao.
Daw gibuboan og bugnaw'ng tubig ang kainit sa dughan sa sobra 700 ka "parallel groups" nga nagduso sa kandidatora ni Mayor Inday sama sa Mayor Sara Duterte Alliance (Masada), Sara All Philippines 2022, Inday Sara for President Movement ug daghan pang uban.
Ang pipila ka lider sa alyansa kay nagpaupaw na sa ilang buhok isip pagpakita sa ilang kasubo nga di na kuno modagan pagka-presidente ang ilang idol nga taga Davao nga kanunay nag-una sa mga survey sa pagka-pangulo sukad pa niadtong 2020.
Ang uban kay nanghipos na kay way padulngan ang ilang paningkamot nga mobutang og lain pang DU30 sa Malacanang. Ang uban nag-ihap na sa ilang nahanaw nga "investment" sa Mayor. Ang uban nga naghandom nga makakuha og taas nga puwesto ubos sa Inday Sara Administration kay nasayangan nga di na madayon ang ilang tinguha nga makaapil sa benepisyo sa anaa sa gahum.
Tiaw mong puwede silang mahimong USec (usik-usik), "advisers," "sulsoltants," komisyoner sa mga ahensiya sa gobyerno nga mabakante ug biyaan na unya pagkahuman sa termino ni PRRD.
Kon di ko masayop, sobra 10,000 ka trabaho sa gobyerno ang bakante inig puli sa bag-ong pangulo sa nasud.
Sa laing bahin, dunay balita nga dungan sa pag-withdraw ni PRody sa iyang kandidatura isip Vice President sa Mayo 2022 elections, iya na usab nga sirad-an ang iyang kinabuhi sa politika.
Dugay na nga plano sa 76 anyos nga pangulo nga gusto na niyang mopahulay ug mobalik sa Davao kauban ang iyang pamilya, mga anak, mga apo nga wa nay mohasol kaniya kabahin sa problema sa nasud. Panahon na tingali nga hatagan nato'g higayon ang pangulo nga magmalipayon sa iyang kinabuhi samtang baskog pa siya.
Ang pag-retiro sa trabaho maoy pinakataas nga kadaugan sa tawo.