ANAA na sa 19,645 ang kinatibuk-ang mga kaso sa coronavirus disease (Covid-19) sa Cagayan de Oro human miubos ang ihap sa mga bag-ong kaso sa maong syudad.
Nakatala and Cagayan de Oro og 67 ka mga kaso sulod sa duha ka adlaw, usa niini locally stranded individual (LSI) ug 66 ang mga local transmissions.
Sumala sa report sa City Health Office, sa 66 ka mga bag-ong lokal nga mga kaso, 29 ang mga local index nga mga kaso, 21 ang mga close contacts sa mga pasyenteng nagpositibo sa coronavirus, unom ang mga local authorized persons outside residence (Apors), tulo ang mga Apors with link, ug pito ang mga persons deprived of liberty (PDLs).
Ang ihap sa mga aktibo nga kaso sa Cagayan de Oro miubos na sad, aduna na karon sa 2,240.
Sa maong numero, 548 niini na-admit sa Northern Mindanao Medical Center ug uban pang mga ospital sa syudad, 1,679 ang mga outpatients, ug 13 ang mga ROFs/LSIs.
Nakatala usab og 410 ka mga Covid-positive nga mga kaso nga karon naka-recover. Anaa na karon sa 16,577 ang ihap sa mga nakarekober nga mga kaso sa dakbayan.
Ang ihap sa mga namatay sa Covid-19 sa syudad anaa na sa 828.