NAKAPILI na og standard bearer pagka-mayor sa Dakbayan sa Sugbo ang Bando Osmeña Pundok Kauswagan (BOPK) alang sa eleksyon sa Mayo 2022.
Kini ang gianunsyo mismo ni kanhi mayor Tomas Osmeña sa iyang Facebook page diin adunay hulagway nga Margot Osmeña Mayor (MOM) nga nakaani na og libuan ka reactions gikan sa mga follower sa page.
“Yes, it’s official. What the city needs now is not a strict father, but a caring mother. Like an ailing child, our city needs help,” matod sa post ni Osmeña.
Giasoy sa kanhi mayor nga ang Cebu City kaniadto maoy adunay labing daghan og mga kaso sa coronavirus disease (Covid-19) diin sagad sa mga namatay senior citizens, kansang assistance giingong wala na mahatod sa ilang mga balay.
Ang gitumbok sa post ni Osmeña mao ang Long Life Medical Assistance Program, pinaagi niini diin hatdan og libreng mga tambal ang mga lolo ug lola sa ilang balay, apan giingong wala na gipadayon sa nakalabay nga duha ka tuig.
“Margot spent 9 years as City Councilor and as acting mayor making these programs and more run and run well. I am not ashamed to admit that she is more qualified than I am to take care of our city in the painful difficulties our people are going through today. Our City needs a MOM,” dugang sa post.
Wala gisukip sa post sa kanhi mayor kon si kinsa ang runningmate sa iyang asawa apan mga kasaligang tinubdan niining pamantalaan nag-ingon nga si ABC President Franklyn Ong ang runningmate.
Si Ong giingong mo-file sa iyang certificate of candidacy (CoC) karong buntag, Oktubre 5.
Una nang nitumaw ang mga taho nga si Cebu City south district Rep. Rodrigo “Bebot” Abellanosa ang modagan pagka mayor samtang si Ong iyang bise.
Niadtong higayuna, si Margot ang giingong modagan pagka kongresista sa south district puli kang Abellanosa.
Si Abellanosa gisuwayan og kuha og habig sa Superbalita Cebu, apan sa pagsuwat ning balita kagabii, wa pa siya motubag.
Sa Facebook post sa radio dyLA nga nagkutlo sa Facebook post sa magsisibyang si Jason Monteclar, kinsa niinterbyu kang Margot, niboluntaryo si Abellanosa nga dili na magpapili pagka mayor bisan kon anaa na siya sa katapusan niyang termino aron wa nay kasamok kon si kinsa ang pilion sa partido.
“I really admire Bebot. Hapit na siya mag-graduate as congressman. Naa siya’y chance mag-mayor, naa siya’y chance mag-vice mayor. Siya mismo ang nagsulti para wala nay gubot, wala nay samok sa pamilya sa BOPK. He will let me run,” matod sa kanhi first lady sa dakbayan sa Sugbo.
Gipahibawo sa kanhi number one councilor sa south district nga nisaad si Abellanosa nga magpabilin nga mosuporta sa BOPK ug moapil sa pagpangampanya atol sa campaign period.
Dugang ni Margot nga kabubot-on sa partido ang pagpili kaniya ug dili paghukom sa iyang bana nga maoy founder sa BOPK.
Ikaatbang ni Osmeña sa pagka-mayor mao ang standard bearer sa administrasyon nga si Bise Mayor Michael Rama kinsa nipili kang City Councilor Raymond Garcia nga maoy iyang runningmate.