ANG Tropical Depression “Lannie” mi-landfall sa habagatang Sugbo sa mga ala 1:45 sa hapon sa Lunes, Oktubre 4, 2021.
Ang iyang pag-landfall sa lungsod sa San Fernando mao ang ikalima human mahimong tropical depression Lannie.
Si Lannie unang ni-landfall sa Liloan, Southern Leyte sa alas 7:30 sa buntag.
Ang tropical cyclone dunay kinakusgang hangin nga 45 kilometro matag takna ug unos nga 55 kilometro matag takna duol sa sentro.
Sayo sa buntag sa Lunes, ang Sugbo usa sa mga dapit sa Kabisay-an nga ubos sa Tropical Cyclone Wind Signal (TCWS) No. 1. Laing mga dapit sa Kabisay-an nga ubos sa TCWS no. 1 mao ang Eastern Samar, Samar, Biliran, Leyte, Southern Leyte, Capiz, Aklan, Antique, Iloilo, Guimaras, Negros Occidental, the northern and central portions of Negros Oriental (Bais City, Mabinay, City of Bayawan, Basay, City of Tanjay, Manjuyod, Bindoy, Ayungon, Tayasan, Jimalalud, La Libertad, City of Guihulngan, Vallehermoso, Canlaon City), ug Bohol.
WAY BIYAHE
Gatusan usab ka mga pasahero ang nangatanggong sa pantalan sa Sugbo human ang Coast Guard Central Cebu misuspenso sa tanang mga biyahe sa tanang mga barko sa Sugbo sugod sa alas 5 sa buntag sa Lunes, Oktubre 4, 2021.
Mao kini ang giluwatan nga kamandoan ni Coast Guard commander Captain Alvin Dagalea ngadto sa tanang mga tag-iya og barko human giisa sa Philippine Atmospheric Geophysical Astronomical Services Administration (Pagasa) ang TCW Signal no. 1 sa Kabisay-an.
Sa Dakbayan sa Lapu-Lapu, dul-an sa 100 ka na-stranded nga mga pasahero nianang buntag ang nakadalidali og uli sa isla kay dili pa kaayo dagko ang bawod bisan kon ubos na sa TCW Signal No 1 ang Sugbo.
Bisan kon dunay nakauli, gipaabot sa kagamhanan nga dunay mangatanggong busa giandaman na og mga higdaanan ug pagkaon sa City Disaster Risk Reduction and Management Office (CDRRMO) ug ang mga Oponganong ma-stranded sa Angasil wharf sa Brgy Mactan paingon sa isla sa Olango.
Matod ni Nagiel Bañacia, pangu sa CDRRMO), nga ila kining gibuhat gumikan kay makita man usab ang sitwasyon sa kadagatan nga dili pa in-ana ka bawod.
“For humanitarian reasons ato gitugotan kay di man kaayo bawod nga kanang naay puti ang dagat,” matod ni Bañacia.
Sa mga pantalan sa Lalawigan sa Sugbo, adunay 130 ka mga pasahero sa nagkadaiyang pantalan ang na-stranded human wa tugoti paglawig ang mga barko.
Nalakip niini ang 44 ka mga pasahero sa Lungsod sa Samboan; 38 sa lungsod sa San Remigio nga gipabakwit na sa Hagnaya Evacuation Center; 17 sa lungsod sa Tabuelan, 11 sa dakbayan sa Danao; 10 sa Tangil Port, Dumanjug; walo sa dakbayan sa Bogo, upat sa lungsod sa Bantayan ug duha sa lungsod sa Tuburan.
Ang tibuok lalawigan sa Sugbo gipailawom sa blue alert, matod ni Wilson Ramos, interim,information officer sa Provincial Disaster Risk Reduction and Management Office (PDRRMO).
GIPABAKWIT
Unom ka mga pamilya sa Barangay Jaclupan, Dakbayan sa Talisay gipabakwit tungod sa hulga sa landslide sa Lunes sa buntag, Oktubre 4, 2021.
Sa samang higayon, wa usab pasudli sa tanang matang sa mga sakyanan ang tipik sa Manipis Road gikan sa Barangay Jaclupan hangtod na sa Barangay Campo 4 tungod sa padayong pagdahili sa mga bato ug yuta nga hulga sa mga sakyanan nga mangagi.
Ang mga landslide nagsugod niadtong Biyernes, Oktubre 2, atol sa pagbunok sa uwan sa Metro Cebu nga nakamugna usab og mga baha.
Human masuta ang pagdahili sa yuta kilid sa unom ka mga balay sa Campo 2, gipabakwit dayon ang unom ka mga pamilya.
Sa inspection sa Talisay City Disaster Risk Reduction and Management Office ug Bureau of Fire Protection (BFP), dunay mga pagpangliki sa yuta sa laing lima pa ka mga balay.
Sa interbyu sa GMA 7 Balitang Bisdak, si Alvin Santillana, pangu sa TCDRRMO, niingon nga lima ka mga dapit ang apektado sa landslide nga nahimutang sa Barangay Jaclupan, Manipis, Campo 4 ug Tapul. (LMY, REV, GCM, ANV)